मंगलबारसम्म चार वाणिज्य सहित एक दर्जन कम्पनीहरुले दोस्रो त्रैमासको वित्तीय विवरण सार्वजनिक गरिसकेका छन् ।
वाणिज्य बैंकममध्ये सिटिजन्स बैंक, सानिमा बैंक,सिद्धार्थ बैंक र लक्ष्मी बैंक सहित चार बैंकले दोस्रो त्रैमासको वित्तीय विवरण सार्वजनिक गरिसकेका छन् ।
जसमध्ये सिटिजन्स् बाहेक अन्य तीन बैंकको खुद नाफामा बढोत्तरी देखिएको छ । तर विगतमा हकप्रद बिक्री र बोनस बाँडेर पूँजी बढाएको अनुपातमा कमाई नबढ्दा प्रतिसेयर आम्दानी खस्किएको विवरण प्रस्तुत गरेका छन् । यी बैंकहरुकै विवरण हेरेर पनि अन्य बैंकहरुको पनि यस्तै प्रकारको विवरण आउने आँकलनमा लगानीकर्ता पुग्दा सेयर कारोबारमा गिरावट देखिएको छ ।
अर्कातर्फ कर्जा लगानी योग्य रकमको अभाव झेलेका बैंकहरुको समस्या समाधानका लागि ठोस पहल नचालिएको अवस्थामा आगामी दिनमा बैंक ब्याजदर बढ्ने त्रास लगानीकर्तामा कायमै रहेको छ । त्यस्तै मौद्रिक नीतिको अर्ध-बार्षिक समिक्षामा केही फेरबदल भैहाल्छ कि भन्ने आसामा पनि लगानीकर्ता पर्ख र हेरको अवस्थामा देखिन्छ । अहिले बाणिज्य बैंकहरूकाे अाैसत कर्जा निक्षेप अनुपात नै ७७.८२ प्रतिशत रहेकाे छ ।
त्यस्तै आधादर्जन बढी कम्पनीको हकप्रद खुलिरहेको अवस्था, अक्सन मार्केट, दुई म्युचुअल फण्डको प्राथमिक निष्कासन र बुटवल पावर कम्पनीको आउँदै गरेको एफपिओका लागि समेत रकम जोहो गर्दा दोस्रो बजारको कारोबार बढ्न सकेको छैन ।
मंगलबार नेप्से परिसूचक ९.०५ अंकले घटेर १३९३.०४ अंकमा झरेको छ । यसदिन १६५ कम्पनीको ८ लाख २८ हजार कित्ता सेयर ३२ करोड २६ लाख रुपैयाँ बराबरमा कारोबार भयो । कारोबार रकम अघिल्लो दिनको तुलनामा चार करोड कमी अाएकाे छ।
यसदिन कारोबारमा आएको सबै समूहको परिसूचक घटेको छ । सानिमा माई हाइड्रोको सबैभन्दा बढी २ करोड ९२ लाख रुपैयाँको सेयर खरिदविक्री भयो । युनिलिभरको पनि दुई करोड बढीको कारोबार भएको छ ।
फर्स्ट माइक्रोफाइनान्स र वल्र्ड मर्चेन्ट फाइनान्सका लगानीकर्ताले सबैभन्दा धेरै पाँच प्रतिशतका दरले कमाए । त्यस्तै सबैभन्दा धेरै गुमाउने कालिका क्रेडिट माइक्रो र एभरेष्ट इन्स्योरेन्सले पनि पाँच प्रतिशतकै दरले गुमाएका छन् । बजार घटेसँगै लगानीकर्ताकाे सम्पत्ती मापन गर्ने समग्र बजार पूँजीकरण १६ खर्ब २८ अर्ब रूपैयाँमा समेटीएकाे छ ।