नेपाल एसबिआई बैंकले चालु आर्थिक वर्षको दोस्रो त्रैमासमा ९१ करोड ३० लाख रुपैंया खुद नाफा गरेको छ । बैंकले गत आर्थिक वर्षको यसै अवधिमा बैंकले ७५ करोड ८७ लाख रुपैंया खुद नाफा गरेको थियो । समीक्षा अवधिमा बैंकको खुद नाफा २०.३४ प्रतिशतले बढेको हो ।
बैंकले यस अवधिमा तीन अर्ब ८८ करोड रहेको चुक्तापूँजी ८ अर्ब नघाएको छ । चुक्तापूँजी बढेको अनुपातमा बैंकको कमाई बढ्न नसक्दा प्रतिसेयर आम्दानीमा गिरावट देखिएको छ । बैंकको प्रतिशेयर आम्दानी २२ रुपैयाँ ६९ पैसा छ । गतबर्षको यही अवधिमा बैंकको प्रतिसेयर आम्दानी ३९ रुपैयाँ थियो ।
निक्षेप संकलन र कर्जाको आकार बढाए पनि बैंकको व्याज खर्च अधिक बढेको छ । जसका कारण उसको खुद व्याज आम्दानी जति बढ्नु पर्ने थियो, त्यति बढ्न सकेको छैन । बैकले यसअवधिमा ८५ अर्ब १६ करोड निक्षेप उठाएर ७१ अर्ब ३४ करोड कर्जा प्रवाह गरेको छ । बैंकको सिसिडि ७७.०३ प्रतिशत छ । जसले गर्दा अझै पनि बैंक केही कर्जा विस्तार गर्न सक्ने अवस्थामा देखिन्छ ।
बैंकको कोषको लागत ५.१४ प्रतिशत छ भने आधार दर ९.५० प्रतिशत छ ।
यसअवधिमा बैंकको खराब कर्जाको आकार केही बढेको छ । बैंकको खराब कर्जा ०.१३ प्रतिशत छ । बैंकले यसअवधिमा खराब कर्जा असुली बढाएको छ भने जोखिम वापतको व्यवस्थापन घटाएको छ ।
बैंकको प्रतिसेयर नेटवर्थ १ सय ४५ रुपैंया ८९ पैसा हुँदा मूल्य आम्दानी अनुपात २६.२२ गुणा बढी छ । यसअवधिमा बैंकको जगेडाकोषको आकार भने केही घटेको छ । बैंकको जगेडाकोषमा ३ अर्ब ६९ करोड छ ।
