बैंकले चालु आर्थिक बर्षको दोस्रो त्रैमाससम्ममा ४८ करोड २ लाख रुपैयाँ खुद नाफा कमाएको छ । जून गतबर्षको यसअवधिको तुलनामा ७१.८९ प्रतिशत बढी हो । गतबर्ष बैंकले २७ करोड ९३ लाख खुद नाफा गरेको थियो ।
बैंकले ठूलो मात्रामा खराब कर्जा उठाएपछि नाफा बढेको हो । बैंकले यसअवधिमा ३७ करोड ८६ लाख खराब कर्जा असुल गरेको छ । जबकी गतबर्ष बैंकले ७ करोड ५२ लाख खराब कर्जा उठाएको थियो । खराबी कर्जा असुली बढाएको बैंकको जोखिम व्यवस्थापन रकम पनि बढेको छ । जसले गर्दा उसको खराब कर्जा १.१४ प्रतिशतबाट बढेर १.६१ प्रतिशत पुगेको छ । बैंकले प्रोभिजनमा २४ करोड रुपैयाँ राखेको छ ।
यसअवधिमा बैंकको नियमित आम्दानी भने सामान्य छ । बैंकको खुद ब्याज आम्दानी बढेको छ तर संचालन नाफा भने घटेको छ । बैंकको कर्मचारी र ब्याज खर्च उल्लेखीय मात्रामा बढेको छ । निक्षेपको ब्याज बढ्दा ब्याज खर्च बढेको छ । बैंकको आधार ब्याजदर नै ११.१७ प्रतिशत छ । त्यस्तै कोषको लागत ४.७० प्रतिशतबाट बढेर ७.८३ प्रतिशत पुगेको छ ।
बैंकको कर्जा पूँजी निक्षेप अनुपात ७६.८२ प्रतिशत छ । अझैपनि बैंकसँग कर्जा विस्तारका लागि केही रकम छ । यसअवधिमा बैकले ५७ अर्ब ६८ करोड निक्षेप संकलन गरेर ५० अर्ब ९२ करोड कर्जा लगानी गरेको छ ।
कुमारीले गतबर्ष काष्ठमण्डप बैंकसँगै महाकाली विकास बैंक, काक्रेविहार विकास बैंक र पश्चिमाञ्चल फाइनान्सलाई गाभेको थियो । जसबाट उसको चुक्ता पूँजी दुई अर्ब ६९ करोडबाट ५ अर्ब ९६ करोड पुगेको छ ।
अझैपनि बैंकले राष्ट्र बैंकले तोकेको पूँजी पुर्याउन सकेको छैन । गत बर्षको बोनस र प्रस्ताबित २० प्रतिशत हकप्रदबाट बैंकको पूँजी आठ अर्ब पुग्नेछ । बैंकको जगेडाकोषको आकार केही बढेर दुई अर्ब ५९ करोड पुगेको छ ।
२० प्रतिशत हकप्रद बिक्रीपछि बैंकको चुक्ता पुँजी ७ अर्ब १६ करोड ३३ लाख ९५ हजार रुपैयाँ पुग्नेछ । अपुग रकम बैंकले गत आर्थिक बर्षको नाफाबाट बोनस वितरण गरेर पुरा गर्नेछ ।
बैंकको प्रतिसेयर आम्दानी १६ रुपैयाँ ९ पैसा,मूल्य आम्दानी अनुपात १७.७१ गुणा, तरलता अनुपात २६.३५ प्रतिशत तथा प्रतिसेयर नेटवर्थ १४३ रुपैयाँ ४० पैसा छ ।
