शुक्रबार कर्जा दुरुपयोग गर्ने तत्कालीन एपेक्स डेभलपमेन्ट बैंकको अध्यक्ष सहित १३ जना अधिकृतहरुलाई नियन्त्रणमा लिएर केन्द्रीय अनुसन्धान ब्यूरोले अनुसन्धान प्रकृया अगाडि बढाएको छ । यो प्रकरणले बैंकको डुबेको कर्जा असुली हुने र खराब कर्जा घट्न गई कम्पनीले आगामी दिनमा नाफा बढाउने आशामा लगानीकर्ताहरु बैंकको सेयरमा आकर्षीत भएका छन् ।
कारोबारमा खरिद चाप देखिएपनि बैंकको सेयरमूल्य भने तीन प्रतिशत बढीले घटेको छ । बैंकको सेयर घटेको मौकामा खरिदकर्ता हाबी हुँदा बैंकको कारोबार पनि उच्च देखिएको छ । एक घण्टा अवधिमा बैंकको ३१ हजार कित्ता बढी सेयर खरिदविक्री भैसकेको छ । बैंकको ५० प्रतिशत हकप्रद बाँकी रहेकाले पनि कारोबार बढेको एक ब्रोकरले मेरोलगानीलाई बताए ।
शुक्रबार केन्द्रीय अनुसन्धान ब्यूरो सिआईबीले एनसीसी बैंकमा छापामारी तत्कालीन एपेक्स डेभलपमेन्ट बैंकको अध्यक्ष सहित १३ जना अधिकृतहरुलाई नियन्त्रणमा लिएको थियो ।
दर्जन बढी कर्मचारीलाई नियन्त्रण लिएपनि राष्ट्र बैंक र स्वयं बैंकले पनि बैंकका लगानीकर्ता तथा निक्षेपकर्तामा कुनै असर नपर्ने बरु बैंकको अवस्था अझ सुदृढ हुने बताएका थिए । उक्त कर्जा उठ्न नसक्ने अवस्था देखिएपछि ऋणको नोक्शानी ब्यवस्थापन गर्न एनसिसीलाई राष्ट्र बैंकले निर्देशन दिएपछि चालू आवको दोस्रो त्रैमासमा नै बैंकले सो व्यवस्था गरिसकेको छ ।
सो प्रकरण तत्कालीन एपेक्स तर्फको कर्जाको विषय भएको र त्यसको नोक्सानी व्यवस्थापन एनसीसीमा भैसकेकाले लगानीकर्ता र सेवाग्राहीलाई कुनै नकारात्मक असर नपर्ने बैंकले विज्ञप्ती मार्फत आईतबार दोहोर्याएको छ ।