बैंकले ९ लाख ९२ हजार ८१९ कित्ता साधारण र ३२ लाख ४४ हजार ६ सय कित्ता संस्थापक सेयर लिलाममा राखेको थियो ।
बैंकको सेयर बिक्री प्रबन्धक लक्ष्मी क्यापिटलका अनुसार साधारण सेयरका लागि ४०४० वटा आवेदन परेको छ भने संस्थागत सेयरका लागि तीन वटा मात्र आवेदन परेको छ ।
यो खबर तयार पार्दा सम्म खोलिएको आवेदनमध्ये अहिलेसम्म सबैभन्दा धेरै एक आवेदकले १८० रुपैयाँका दरले एक हजार कित्ता माग गरेका छन् । सबैभन्दा कम एक सय रुपैयाँमै सेयर माग गर्नेहरुको आवेदन पनि निक्कै परेको छ ।
धेरैजसो आवेदकले प्रतिकित्ता १२५ रुपैयाँ देखि १३५ रुपैयाँको बीचमा सेयर माग गरेका छन् । केही आवेदकहरुले १४० रुपैयाँसम्म सेयर कबुल्न बोली लगाएका छन् । यसको अन्तिम नतिजा भने बेलुकासम्म आइपुग्ने क्यापिटलले जनाएको छ ।
बैंकको न्यूनतम शेयरमूल्य एक सय रुपैयाँ तोकिएको छ । लगानीकर्ताले न्यूनतम एक सय कित्ता र अधिकतम निष्कासन गरेजति सबै सेयरका लागि आवेदन गर्न सक्ने व्यवस्था थियो ।
बैंकले गत मंसिर २२ गतेदेखि माघ १२ गतेसम्म बिक्री खुला गरेको हकप्रदमा नबिकेको सेयर लिलामीमा ल्याएको हो ।
सिभिल बैंकले चालु आर्थिक वर्षको दोस्रो त्रैमासमा २१ करोड ६९ लाख खुद नाफा गरेर प्रतिसेयर आम्दानी ८ रुपैयाँ ३४ पैसा कायम गरेको छ । बैंकको प्रतिसेयर नेटवर्थ १३३ रुपैयाँ ५६ पैसा, पूँजी कोष अनुपात १८.३६ प्रतिशत र निक्षेप लागत ८.१४ प्रतिशतमा पुगेको छ ।
समिक्षा अवधिमा बैंकले ३७ अर्ब निक्षेप संकलन गरेको बैंकको कर्जा विस्तार ३३ अर्ब ५५ करोड रुपैयाँ छ । पाँच अर्ब १८ करोड रुपैयाँ चुक्ता पूँजी रहेको बैंकको जगेडा कोषमा एक अर्ब ७३ करोड रुपैयाँ सञ्चित रहेको छ ।
