मंगलबार बिहानदेखि खोलिएको बोलकबोलको प्रारम्भिक नतिजा पनि प्राप्त भएको छ । दोस्रो बजारमा लगानीकर्ता उत्साहित नसकिरहेका बेला सिभिलको लिलामी सेयरमा भने उत्साहित बनेको देखिएको छ ।
दोस्रो बजार निरन्तर तल झरिरहेका बेला सिभिलको लिलामीमा लगानीकर्ताका बिचमा तिब्र प्रतिष्पर्धा देखिएको छ । जसका कारण दोस्रो बजारको मूल्यकै हाराहारीमा सेयर सकार्नेको भिड देखिएको हो । प्रारम्भिक नतिजा अनुसार बैंकको प्रतिकित्ता सेयरको न्युनतम मूल्य १३३ रुपैंया कायम भएको छ ।
बैंकको लिलामीको सेयर खरिद गर्नेक्रममा एक लगानीकर्ताले प्रतिकित्ता १८० रुपैयाँको बोली लगाएका छन् । मंगलबार दोस्रो बजारमा १४८ रुपैंया प्रतिकित्ताको दरमा अन्तिम पटक कारोबार भएको सेयरका लागि परेको आवेदनले तिब्र प्रतिष्पर्धा देखाएको हो । मोहनमान सिंह नामका एक लगानीकर्ताले बैंकको १ हजार कित्ता सेयरका लागि अधिकतम १८० रुपैंया कबोल गरेका छन् ।
बैंकले ९ लाख ९२ हजार ८१९ कित्ता साधारण र ३२ लाख ४४ हजार ६ सय कित्ता संस्थापक सेयर लिलाममा राखेको थियो । जसमा साधारण सेयरका लागि ४ हजार ४० वटा आवेदन परेको थियो । रद्ध भएका आवेदन तथा सेयर सकार्नेहरुको अन्तिम विबरण आउन बाँकी छ । बैंकको संस्थापक सेयर भने बिक्री हुन सकेन । लिलाममा ठुलो संख्यामा सेयर राखिए पनि ९ जनाले १ लाख २३ हजार कित्ता संस्थापक सेयर मात्र सकारेका छन् । नौ जनाले बैंकको संस्थापक सेयर एक सय रुपैंयाको दरमा सकारेका हुन् । ३२ लाख ४४ हजार ६ सय कित्ता संस्थापक सेयरमध्ये उल्लेखित सेयर बिक्री भए पछि बाँकी रहेको सेयर लिलामीको सूचना बैंकले फेरी निकाल्ने भएको छ ।
दशले भाग जाने गरी आवेदन नपरेका धेरै आवेदनहरु रद्ध भएको व्यहोरा बोलकबोल खोल्दा सुनाइएको थियो । यसलाई सेयर लिलामी प्रकृयाको ट्वीस्टका रुपमा हेरिए पछि बैंकले सूचना अनुसार नै अड संख्याका आवेदकलाई पनि सेयर बितरण गर्ने निर्णय गरेको हो । बैंकको न्यूनतम शेयरमूल्य एक सय रुपैयाँ तोकिएको थियो । लगानीकर्ताले न्यूनतम एक सय कित्ता र अधिकतम निष्कासन गरेजति सबै सेयरका लागि आवेदन गर्न सक्ने व्यवस्था थियो ।
कसले कति मूल्यमा माग्यो सेयर ?
बैंकको लिलामी सेयरका लागि संस्थागत तथा व्यक्तिगत लगानीकर्ताका बिचमा तिब्र प्रतिष्पर्धा देखिएको छ । बीरेन्द्र शाहले १२६ रुपैंया ४ पैसामा ५० हजार कित्ता सेयर माग गरेका थिए । त्यसै गरी चन्द्रसिंह साउदले १३५ रुपैंयाको दरमा १ हजार कित्ता सेयर माग गरेकोमा चार्टर्ड इन्भेष्टमेण्ट कम्पनीले १३५ को दरमा १० हजार कित्ता सेयर माग गरेको छ । सन नेपाल लाइफले १३७ रुपैंयाको दरमा ५० हजार कित्ता सेयर माग गरेको छ भने बिजेन्द्र जोशीले १३५ रुपैंयाको दरमा १ लाख ५ हजार कित्ता सेयर माग गरेका छन् ।
त्यसै गरी सोनी जोशीले १३४ रुपैंयाको दरमा ९५ हजार कित्ता, तनुज गोविन्द जोशीले १३७ रुपैंयाको दरमा २८ हजार कित्ता सेयर माग गरेका छन् । प्रभु इन्स्योरेन्सले १२१ रुपैंयाको दरले ४१ हजार कित्ता सेयर माग गरेकोमा समृद्धि क्यापिटलले १३१ रुपैंयाको दरमा २० हजार कित्ता सेयर माग गरेको छ । उल्लेखित लगानीकर्ताहरु मध्ये १३३ रुपैंयाभन्दा तलको मूल्यमा सेयर माग गर्ने खाली हात भएका छन् । व्यक्तिगत रुपमा पनि ठूलो संख्यामा सेयर माग गर्नेको संख्या धेरै भएका कारण सेयर सकार्नेका बिचमा तिब्र प्रतिष्पर्धा देखिएको हो ।
बैंकले गत मंसिर २२ गतेदेखि माघ १२ गतेसम्म बिक्री खुला गरेको हकप्रदमा नबिकेको सेयर लिलामीबाट बिक्री गरेको हो ।
...[१५० हाराहारीको सेयरलाई १८० रुपैयाँसम्मको बोली]...