पछिल्लो समयमा सिभिल बैंक र एनसीसी बैंकले लिलामीमा निष्कासन गरेको संस्थापक शेयर बिक्री नहुनाले यसको पुष्टि गर्छ ।
सिभिल बैंकले लिलामीमा राखेको ३२ लाख ४४ हजार ६ सय कित्ता संस्थापक सेयरमध्ये ३१ लाख २१ हजार ६०० कित्ता सेयर बिक्री हुन सकेन । बैंकले गत फागुन २३ गतेदेखि चैत्र १ गतेसम्म उक्त सेयर लिलामीमा राखेको थियो ।
संस्थापक सेयर बिक्री नभएपछि बैंकले पुन: सर्वसाधारणले समेत आवेदन दिन पाउने गरी लिलामी निकालेको छ । जसमा यहि चैत्र १४ गतेदेखि २१ गतेसम्म आवेदन दिन पाइनेछ । जसको न्यूनतम शेयरमूल्य प्रतिकित्ता एक सय रुपैयाँ तोकिएको छ । लक्ष्मी क्यापिटल शेयर निष्कासन तथा बिक्री प्रबन्धक रहेको छ ।
बैंकले गत मंसिर २२ गतेदेखि माघ १२ गतेसम्म बिक्री खुला गरेको हकप्रदमा नबिकेको सेयर लिलामीमा ल्याएको हो ।
यता एनसीसी बैंकले केही समय अघि ७० लाख कित्ता संस्थापक सेयर लिलामीमा ल्याएको थियो । जसमा एक जना लगानीकर्ताले मात्र ३ हजार कित्ता सेयरका लागि आवेदन गरेपछि ६९ लाख ९७ हजार कित्ता सेयर बिक्री हुन सकेन ।
एनसीसी बैंक ५० प्रतिशत हकप्रद निष्कासनको प्रक्रियामा छ । लिलामीको सेयर सकार्नेहरुले हकप्रदको लागि समेत तयार रहनुपर्ने हुँदा बैंकको लिलामीको संस्थापक सेयरमा आर्कषण कम देखिएको हो ।
बैंकको लिलामीको सेयर नबिकेपछि बिक्री प्रबन्धक र बैंकले सेयर बिक्री गर्न पुन सूचना प्रकाशित गर्नुपर्नेछ । यसले यिनीहरुको खर्च समेत बढ्ने देखिएको छ ।
अर्कातर्फ निरन्तर दोस्रो बजार ओरालो लागेकाले पनि लगानीकर्ताहरु यतिबेला बजारप्रति आशावादी देखिँदैनन् । साधारण सेयर जस्तो संस्थापक सेयरको खरिद बिक्री दोस्रो बजारमा सहजै नहुने हुँदा पनि लिलामीको संस्थापक सेयरले लगनाीकर्तालाई नतानेको स्पष्टै देखिन्छ ।