एसबिआई बैंकले निक्षेप बढाउनकै लागि संस्थागत लगानीकर्तालाई त्रैमासिक रुपमा नै संस्थागत निक्षेपकर्तालाई मुद्धती खातामा ९ प्रतिशत ब्याजदर मासिक रूपमा भुक्त्तानी गर्ने भएको छ । यसअघि संस्थागत निक्षेपकर्तालाइ बैंकले बार्षिक रुपमा ९ प्रतिशत ब्याजदर दिँदै आएको थियो । यस्तो ब्याज मासिक रुपमा भुक्तानी गर्ने गरेको थियो ।
बैंकले संस्थागत लगानीकर्ता आकर्षित गर्नकै लागि चैत १६ गते गरेको मुद्धती बचतको ब्याजदर १२ औं दिनमै परिवर्तन गरेको हो । यसअघिको सूचनामा बैंकले ६ महिनाभन्दा कम अवधिको संस्थागत निक्षेप संकलन गर्ने गरि ब्याजदर प्रकाशित गरेको थिएन ।
एसबिआईले चैत १६ गते १ देखि ३ महिना अवधिमा व्यक्तिगत र विदेशी कुटनैतिक संस्थाहरूलाई ४.२५ प्रतिशत ब्याजदर प्रदान गर्ने उल्लेख गरेको थियो । चैत २८ गते प्रकाशित गरेको सूचनामा बैंकले व्यक्तिगतको ४.२५ प्रतिशत भन्दा दोब्बर ९ प्रतिशत ब्याजदर प्रदान गर्ने उल्लेख गरेको छ ।
यसले बैंकहरुले निक्षेपकाे तुलनामा धेरै कर्जा लगानी गरेपछि तेस्रो त्रैमासिक प्रतिवेदनमा कर्जा निक्षेप अनुपात घटाउन लागेको स्पष्ट बुझ्न सकिन्छ । यसरी राष्ट्र बैंकको कारबाही छल्न बैंकहरुले घुमाउरो पाराका अनेकौं उपाएहरुको अवलम्बन गर्दे निक्षेप बढाउने प्रयास गर्न थालेका हुन् ।
सिभिल बैंकको माघदेखि नै संस्थागत लगानीकर्तालाई आकर्षित गर्न त्रैमासिक अवधिमा ९ प्रतिशत व्याजदर प्रदान गर्दे आइरहेको छ ।
यसअघि अन्य बाणिज्य बैंकहरु सिभिल बैंक, एनआईसी एशिया, नबिल बैंकले पनि निक्षेप आकर्षित गर्न विभिन्न फमूर्ला अबलम्बन गरेका थिए । बैंकहरुले प्रकाशन गर्ने ब्याजदर पटक पटक परिवर्तन हुँदा त्यसको प्रतक्ष्य प्रभाव सेयर बजारमा समेत पर्ने गरेको छ ।
राष्ट्र बैंककाे अनुसार बैंकिङ प्रणालीमा अहिले २६ अर्ब रुपैयाँ अधिक तरलता छ । बैंकिङ्ग प्रणालीमा लगानी योग्य पुँजीको अभाव हुँदा यसअघि बैंकहरुले संस्थागत निक्षेपकर्ताबाट १३ प्रतिशतसम्म ब्याजदरमा निक्षेप उठाएका थिए ।
बैंकहरुले संस्थागत निक्षेपकर्ताबाट बढी ब्याजदरमा निक्षेप उठाउन थालेपछि बैंकर्स संघको सहमतिमा बाणिज्य बैंकहरूले संस्थागत मुद्धतीमा अहिले ९ देखि अधिकतम ११ प्रतिशतसम्म ब्याजदर प्रदान गरिरहेका छन् ।
ब्याजदर वृद्धि बारे के भन्छ बैंक ?
बैंकको कम्पनी सचिव रमेश घिमिरेले मेरोलगानीसँग बजारको आवश्यकता अनुसार नै बैंकले ब्याजदर बढाएको बताए । उनले हरेक बैंकले समयको माग र बजारसँग मेल खानेगरी आफ्नो आफ्नो स्कीम सार्वजनिक गर्ने हुँदा बैंकले पनि सोही अनुसार छोटो अवधिको ब्याजदर वृद्धि गर्नुपरेको उल्लेख गरे ।
घिमिरेले बैंकहरुमा बढेको निक्षेप अभावका कारण नै एसबिआईले पनि ३ महिना अवधिमा ९ प्रतिशत व्याज प्रदान गर्नुपर्ने बाध्यता अाएकाे सुनाए । लगानी गर्ने तरलता सहज भएको भए यो अवस्था नआउने जिकीर गर्दे उनले सबै बजारमा देखिएको निक्षेप अभावको असरका कारण उत्पन्न भएकाे बताए । बजारको अवस्था अनुसार बैंकले आफ्नो ब्याजदरमा परिमार्जन गर्नुपरेको उनको भनाई छ ।
एसबिआई बैंकको दोस्रो त्रैमासिक प्रतिवेदन अनुसार बैंकको कर्जा निक्षेप अनुपात ७७.०३ रहेको छ । यस अवधिमा बैंकले ८५ अर्ब १६ करोड रुपैयाँ निक्षेप संकलन गरी ७१ अर्ब ३४ करोड रुपैयाँ कर्जा प्रबाह गरेको थियो ।