विश्व बैकंले विगत तीन वर्षदेखि नेपालमा तरलता अभाव भएको र त्यसको प्रमुख कारण यथार्थपरक बजेट नबन्नुलाई प्रमुख कारण मानेको छ । स्रोत नभए पनि बजेटमा कार्यक्रम देखाउने र वित्तीय सुशासन कायम नगर्ने मामलामा नेपाल अगाडि देखिएको पनि विश्व बैंकले आफ्नो प्रतिवेदनमा उल्लेख गरेको छ ।
विश्व बैङ्कका नेपाल प्रतिनिधि दामिर कौशिकले पछिल्ला तीन आर्थिक वर्षको बजेट ’अवास्तविक’ तरिकाले निर्माण गरिएकाले नै तरलता अभावसँगै ब्याजदर वृद्धिको समस्या आएको बताएका हुन् । उनले स्रोतबीना बजेटको आकार बढाउने, पैसा खर्च नगरी कोषमा थुपारेर राख्ने र निजी क्षेत्रले परिचालन गर्ने रकम सरकारको कोषमा थुप्रिएर बस्ने जस्ता कारणले वित्तीय क्षेत्रमा उतारचढाव देखिएको बताए।
आर्थिक वृद्धि ४.६ प्रतिशत मात्र
साथै विश्व बैकले चालु आर्थिक बर्षमा नेपालको आर्थिक वृद्धिदर ४ दशमलव ६ प्रतिशत रहने प्रक्षेपण समेत गरेको छ । सरकारले चालू आर्थिक वर्षर्म ६ प्रतिशत आर्थिक वृद्धिको लक्ष्य राखेको छ । केही दिनअघि एसियाली विकास बैंकले ४.९ प्रतिशत मात्रै आर्थिक वृद्धि हुने प्रक्षेपण गरेको थियो ।
हिउँदे बालीमा आएको गिरावट, रेमिट्यान्सको घट्दो अवस्थालगायतका कारण सरकारले लिएको आर्थिक वृद्धिको लक्ष्य भेटाउन कठीन हुने विश्व बैंकले जनाएको छ ।
