पूर्ण स्वचालित अनलाईन कारोबार प्रणालीको निमार्ण गरेको भेण्डर कम्पनी वाईको नेपालले उक्त प्रणालीमा समावेश हुने सबै १६ वटा मोडलहरु निमार्ण सम्पन्न गरिसकेपछि सेयर दलालहरुलाई अनलाईनको स्वरुप र प्रणालीगत संरचनाबारे जानकारी गराउन लागिएको नेप्सेले जनाएको छ ।
नेपाल स्टक एक्सचेञ्जका प्रमुख कार्यकारी अधिकृत चन्द्र साउदले ब्रोकरहरु माझ डेमो सार्वजनिक गरेपछि उक्त प्रणालीमा सुधार गर्नुपर्ने भएमा सुधार गरेर एक महिना भित्रमा परिक्षणमा लगिने जानकारी दिए । प्रणालीमा धेरै सुधार गर्नु नपरे जतिसक्दो छिटो संचालनमा आउने साउदको भनाई छ ।
वाईको र नेप्सेबीचको सम्झौता पत्रमा जेठ १८ गतेसम्म पूर्ण अनलाईन कारोबार प्रणाली निर्माण सम्पन्न गरिसक्नुपर्ने उल्लेख छ । पूर्ण अनलाईन कारोबार प्रणाली संचालन भएपछि सेयर बजार पूर्ण स्वचालित हुनेछ । यसले सेयरबजारको बिकास र बिस्तार हुने अपेक्षा गरिएको छ ।