गतबर्षको तेस्रो त्रैमासको तुलनामा बैंकको संचालन मुनाफा एघार प्रतिशतले घटेपनि खुद नाफा भने करिब पाँच प्रतिशतले बढेको छ ।
बैंकले चैतमसान्तसम्ममा एक अर्ब ६१ करोड खुद मुनाफा गरेको छ । जुन गतबर्षको भन्दा ४.९९ प्रतिशत अर्थात ८ करोड मात्रै धेरै हो। गतबर्ष बैंकले एक अर्ब ५३ करोड खुद मुनाफा कमाएको थियो ।
बैंकको निक्षेप लागत ३.२५ प्रतिशतबाट बढेर ६.३५ प्रतिशतमा उक्लेपछि नाफा बढ्न नसकेको हो । ६ अर्ब ८७ करोड व्याज आम्दानी गर्दा बैंकले ३ अर्ब ९६करोड व्याज खर्च गरेको छ । जसबाट बैंकले २ अर्ब ९१ करोड रुपैयाँ खुद व्याज आम्दानी गर्न सफल भएको छ । गतबर्षको यसै अवधिको भन्दा बैंकको खुद ब्याज आम्दानी ५.०९ प्रतिशतले मात्र बढी हो ।
यस अवधिमा बैंकले ९६ अर्ब ३२करोड रुपैयाँ निक्षेप संकलन गरि ८५ अर्ब ४५ करोड रुपैयाँ कर्जा लगानी गरेको छ । बैंकको निक्षेप ३.७० प्रतिशत र कर्जा ९.४४ प्रतिशतले बढेको छ । निक्षेप संकलनमा बैंक कमजोर देखिएको छ ।
कर्जा निक्षेप अनुपात ७८.७४ प्रतिशत पुगेको बैंकको निष्कृय कर्जा अनुपात ०.९० बाट १.१९ प्रतिशतमा बढेको छ । यसले बैंकले थप कर्जा विस्तार गर्ने अवस्था देखिँदैन ।
बैंकको अन्य सञ्चालन आम्दानी केही बढेपनि शूल्क तथा कमिशन र विदेशी मुद्रा सटहीबाट खासै आम्दानी बढ्न सकेको छैन । कर्मचारी खर्च र अन्य सञ्चालन खर्च सामान्य बढेको छ भने कर्जा नोक्सानी वापत बैंकले ३५ करोड ९१ लख व्यवस्था गरेको छ । यीनै कारणले बैंकको नाफा बढ्न नसकेको हो ।
चुक्ता पूँजी ६ अर्ब ४९करोडबाट आठ अर्ब ११ करोड रुपैयाँ पुगेपछि बैंकको प्रतिसेयर आम्दानी ३१.५३ रुपैयाँबाट २६.४८ रुपैयाँमा झरेको छ । पूँजी वृद्धिको अनुपातमा आम्दानी बढ्न नसक्दा बैंकको इपिएस तल झरेको हो ।
बैंकको प्रतिसेयर नेटवर्थ १६४ रुपैयाँ तथा मुल्य आम्दानी अनुपात २३ गुणा रहेको छ । बैंकको जगेडाकोष भने बढेर ५ अर्ब २० करोड पुगेको छ ।
