पूँजी वृद्धिको विकल्पमा प्रकृयागत कारणले अलमलिन पुगेको एनएमबी बैंकले तेस्रो त्रैमासमा खुद नाफा २३ प्रतिशतले बढाएपछि प्रतिसेयर आम्दानी पनि बढेको हो ।
बैंकले चालु बर्षको तस्रो त्रैमासमा प्रतिसेयर आम्दानी २९ रुपैयाँ देखाएको छ । जबकी गतबर्षको यसै अवधिमा उसको प्रतिसेयर आम्दानी २३.६० रुपैयाँ थियो ।
हालसम्म तेस्रो त्रैमासको वित्तीय विवरण सार्वजनिक गरेका वाणिज्य बैंकमध्ये प्रतिसेयर आम्दानी बढोत्तरी गर्नेमा एनएमबी अगाडि देखिएको छ । यसअघि प्राइम कमर्सियल बैंकले इपिएस सामान्य बढेको विवरण सार्वजनिक गरेको थियो ।
बैंकको चुक्ता पूँजी स्थिर रहेकाले प्रति सेयर आम्दानी बढेको हो । हाल बैंकको ६ अर्ब ४६ करोड चुक्ता पूँजी छ । राष्ट्र बैंकले तोकेको चुक्ता पूँजी पुर्याउन बैंकलाई अझै एक अर्ब ५४ करोड पूँजी आवश्यक छ ।
यद्यपी बैंकले चुक्ता पूँजी ८ अर्ब पुर्याउने क्रममा यो प्रतिसेयर आम्दानीमा संकुचन आउने देखिन्छ । बैंकले एफपिओ निष्काशन गर्न नपाएको खण्डमा उसले बोनसबाट मात्र चुक्ता पूँजी ८ अर्ब पुर्याउनु पर्ने हुन्छ । अहिले बैंकको जगेडा कोषमा ५ अर्ब ६३ करोड रुपैंया सञ्चित छ ।
चालु आर्थिक वर्षको तेस्रो त्रैमासमा बैंकले एक अर्ब ४१ करोड खुद नाफा कमाएको छ । गत आर्थिक वर्षको यसै अवधिमा बैंकले एक अर्ब १४ करोड कमाएको थियो । बैंकको नाफा गतबर्षको यसै अवधिमा भन्दा २३.३० प्रतिशतले बढी हो ।
बैंकको निष्कृय कर्जा अनुपात १.७० प्रतिशतबाट १.१० प्रतिशतमा झरेको छ । सिसिडी ७५.३३ प्रतिशत छ । मूल्य आम्दानी अनुपात १५.२९ गुणा बढी रहेको छ । ८५ अर्ब २९ करोड ६२ लाख निक्षेप संकलन गरेको बैंकले ७४ अर्ब १ करोड ३७ लाख कर्जा प्रवाह गरेको छ । बैंकको निक्षेप २० प्रतिशत तथा कर्जा २३ प्रतिशतले बढेको छ ।