गत बर्षको तेस्रो त्रैमासमा ३० प्रतिशतले नाफा बढाएको नबिल बैंकले चालू आवको तेस्रो त्रैमासमा भने चुक्ता पूँजीको वृद्धिको अनुपातमा निकै थोरै मात्र नाफा खुद नाफा बढाएको छ । गत बर्ष दुई अर्ब ६३ करोड नाफा गरेको बैंकको नाफा दुई अर्ब ७९ करोड पुगेको छ ।
तरलता संकटकले बैंकको निक्षेप लागत दोब्बर बढेको छ । गत बर्ष २.२८ प्रतिशत रहेको लागत बढेर ४.६३ प्रतिशत पुग्दा बैंकको निक्षेप वृद्धि पाँच प्रतिशत मात्र बढेको छ । उता कर्जा लगानीमा १६ प्रतिशत बढाएको छ । यस अवधिमा बैंकले एक खर्ब २३ अर्ब निक्षेप संकलन गरि एक खर्ब पाँच करोड रुपैयाँ कर्जा परिचालन गरेको हाे ।
नबिल बैंक निक्षेप संकलन र कर्जा प्रवाहमा अन्य समकक्षी बैंकहरु इन्भेष्टमेन्ट र एनआईसी एशिया बैंकभन्दा पछाडि परेको छ । यसअघि खुद नाफामा र निक्षेप संकलन र कर्जा परिचालनमा अरु बैंकभन्दा अगाडि रहने गरेको थियो । बैंकलाई खुद नाफामा इन्भेष्टमेन्ट बैंकले ४ कराेड रूपैयाँले पछाडि पारेको छ ।
बैंकको व्याज आम्दानीभन्दा झण्डै तीन गुणा बढी व्याज खर्च बढेकाले खुद नाफामा प्रतक्ष्य असर गरेको देखिन्छ । निष्कृय कर्जा अनुपात बढ्न पुग्दा बैंकलार्इ गत बर्षको यसै अवधिको तुलनामा २३ करोड थप कर्जा नोक्सानी व्यवस्थाको भार थपिएको छ ।
बैंकको कर्जा निक्षेप अनुपातमा भने सुधार आएको छ । गत बर्ष झण्डै ८० प्रतिशत रहेकोमा अहिले ७६ प्रतिशत मात्र देखिन्छ । कर्मचारी खर्चमा २२ प्रतिशत बढी खर्च गरेको बैंकले अन्य सञ्चालन खर्चमा भने नियन्त्रण नै गरेको छ ।
बैंकले ६ अर्ब १८ करोडको चुक्ता पूँजीमा ३० प्रतिशत बोनस वितरण गरेर आठ अर्ब तीन करोड पुर्याएकाे छ । उता प्रतिसेयर आम्दानी १२ रुपैयाँले संकुचन आई ४६ रुपैयाँ ८३ पैसा कायम भएकाे छ ।
