चालू आवको ९ महिनाको अवधिमा बैंकले ५४ करोड ३१ लाख रुपैयाँ खुद नाफा आर्जन गरेको छ जुन गत बर्षभन्दा तीन गुणा बढी हो । एनसीसीमा मर्ज भएको एपेक्स डेभलपमेन्ट लगायतको खराब कर्जा (४.६८%) उल्लेख्य बढेपछि गत बर्ष बैंकले एक अर्ब बढी नोक्सनी व्यवस्था गरेको थियो । सोही कारण बैंकको खुद नाफा १६ करोडमा खुम्चिएको थियो ।
चालू अावकाे ९ महिनाकाे वित्तिय विवरण निकालेका बाणिज्य बैंककाे खुद नाफाका अाधारमा हेर्दा भने बैंककाे नाफा सिभिल र मेगा बैंकभन्दा बढी हाे । यद्यपि याे नाफा प्रयाप्त हैन अन्य बैंकसँग प्रतिस्पर्धामा उत्रन बैंकलार्इ थप सुधार अावश्यक देखिन्छ ।
एपेक्स काण्डमा कमसल धितो राखेर कर्जा लिएका ऋणीदेखि सो कर्जा प्रवाहमा संलग्न बैंकका उच्च कर्मचारीहरुलाई समेत नेपाल प्रहरीको केन्द्रीय अनुसन्धान ब्यूराले नियन्त्रणमा लिएर अहिले कारबाही प्रकृया अगाडि बढाएको छ । यस सन्दर्भमा बैंकले यसअघि गरेको नोक्सानी व्यवस्था र ऋण उठ्न सकेमा बैंक अझ सशक्त बन्दै जाने देखिन्छ ।
बैंकले खराब कर्जा अनुपात घटाएपछि नोक्सानी व्यवस्था ७६ प्रतिशतले घटेर २३ करोड मात्र गरेको छ भने कर्जा असुली १६ करोडबाट बढाएर ४४ करोड पुर्याएको छ जसले बैंकको नाफा वृद्धिमा सहयोग गरेको देखिन्छ । कर्जा निक्षेप अनुपातमा केही सुधार गरेपनि बैंकको निक्षेप संकलन र कर्जा परिचालन निकै सुस्त देखिन्छ ।
तेस्राे त्रैमाससम्ममा बैंककाे व्याज खर्च गत बर्षभन्दा ६७ प्रतिशत र कर्मचारी खर्च २८ प्रतिशतले बढेको छ । बैंकको निक्षेप संकलन लागत ५० प्रतिशतले बढेपछि बैंकको आधार व्याजदर १२ प्रतिशत माथि पुगेको छ । बैंकले गत बर्ष शतप्रतिशत बढी निक्षेप र कर्जा लगानी बढाएपनि अहिले भने ६ प्रतिशत हाराहारी मात्र बढेकाे देखिन्छ । यसमा बढाेत्तरी गर्न अावश्यक देखिन्छ ।
बैंकको व्याज आम्दानीमा २६ प्रतिशत सुधार अाएपनि व्याज खर्च बढेपछि खुद व्याज आम्दानी भने गत बषभन्दा ५३ करोड कम आर्जन भएको छ । गत बर्ष एक अर्ब ५४ करोड व्याज आम्दानी गरेको बैंकको खुद व्याज आम्दानी एक अर्ब एक करोडमा समेटिएको हो ।
आठ अर्ब चुक्ता पूँजी पुर्याउन बैंकले ५० प्रतिशत हकप्रद बिक्री गर्ने निर्णय गरेपनि त्यो प्रकृया विविध अल्झनले अगाडि बढ्न सकेको छैन । यसकारण बैंकको चुक्ता पूँजी ४ अर्ब ६७ करोड नै रहेको देखिन्छ । पूँजी नबढेपछि र खुद नाफामा साढे ३७ करोडले सुधार गर्दा बैंकको प्रतिसेयर आम्दानी ५ रुपैयाँबाट साढे १५ रुपैयाँ पुगेको छ ।
बैंकले ७३ करोडले जगेडा कोष सुधार गरेर ३ अर्ब १२ करोड सञ्चित गरेको छ । जुन गत बर्षको भन्दा ३० प्रतिशत बढी हो । कम्पनीको पूँजी कोष अनुपात गत बर्षभन्दा कम भएकाले अवस्था सुधार्नु चाँही अनिबार्य बन्न जान्छ ।
एनसीसी बैंकले एपेक्स सहित इन्टरनेशनल डेभलपमेन्ट बैंक, सुप्रिम डेभलपमेन्ट बैंक, इन्फास्टक्चर डेभलपमेन्ट बैंकलाई आफुमा मिलाएर २०७३ पुस १७ गतेदेखि एकीकृत कारोबार थालेको थियो ।