बैंकले योजना बनाएर सेयर रुपान्तरणको सूचना निकालेको हो वा हैन हामी भन्न सक्दैनौ, तर यसले बैंकको संस्थापक सेयर लिलामीका बेला सेयर सकार्नेहरु अघि सर्ने देखिन्छ । बैंकले हाल कायम चुक्ता पूँजीको झण्डै १० प्रतिशत संस्थापक सेयर साधारण सेयरमा रुपान्तरण गर्ने भएको हो ।
बैंकले केही समय अघि निष्काशन गरेको ४० प्रतिशत हकप्रदमा नबिकेको झण्डै २५ लाख कित्ता सेयर लिलाम पश्चात चुक्ता पूँजी ८ अर्ब २४ करोड हाराहारी पुग्नेछ । उक्त सेयर मध्ये अहिले संस्थापकको हिस्सा ६१.३१ प्रतिशत तथा सर्वसाधारणको ३८.६९ प्रतिशत छ । यसलाई ५१ अनुपात ४९ बनाउन बैंकले १०.३१ प्रतिशत संस्थापक सेयरलाई साधारण सेयरमा रुपान्तरण गर्न लागेको हो । जस अनुसार बैंकले झण्डै ८५ लाख कित्ता संस्थापक सेयर साधारणमा रुपान्तरण गर्नेछ ।
बैंकले सूचना मार्फत सेयर रुपान्तरण गर्न तयार भए नभएको सम्बन्धमा बैंकलाई जानकारी गराउन ३५ दिनको समयसीमा दिएको छ ।
