मंगलबारको कारोबार रकम अघिल्लो दिन सोमबारको तुलनामा २८ करोड रुपैयाँ कम हो । सोमबार सेयरबजारमा ४२ करोड रुपैयाँ बराबरको सेयर किनबेच भएको थियो ।
धितोपत्र बोर्डले ग्राहक पहिचान विवरण (केवाइसी) नविकरण नगर्ने ग्राहकलाई कारोबार नगराउन निर्देशन दिएपछि मंगलबारको सेयर कारोबारमा गिरावट आएको हो । धितोपत्र बोर्डले केही महिना अगाडि नै वैशाखमसान्तभित्र ग्राहक पहिचान विवरण (केवाइसी) नविकरण गराउन ब्रोकहरुलाई निर्देशन दिएको थियो ।
बोर्डको निर्देशन अनुसार ग्राहक विवरण नविकरण नगराउने लगानीकर्तालाई ब्रोकर कार्यालयहरुले कारोबारमा रोक लगाएका थिए । जसले गर्दा सेयर कारोबारमा भारी गिरावट देखिएको हो ।
मंगलबारको बजारमा १४३ कम्पनीको ३ लाख १९ हजार कित्ता सेयर १४ करोड ९२ लाख रुपैयाँ बराबरमा कारोबार भएको छ । यसदिन सबैभन्दा बढी मिर्मिरे माईक्रोफाइनान्सको ८६ लाख रुपैयाँ बराबरको सेयर किनबेच भयो ।
ग्राहक पहिचान विवरण नविकरण नगर्नेले सेयर कारोबार गर्न नपाउने
न्यून रकमको कारोबार भएको बजारमा नेप्से परिसूचकमा समेत गिरावट आएको छ । यसदिन नेप्से ४.३२ अंकले घटेर १३३३.८५ अंकमा झरेको छ भने उत्पादन र व्यापार समूहका बाहेक सबै समूहका उप सूचकमा गिरावट आएको छ ।
यसदिन हिमालयन डिष्टलरीका लगानीकर्ताले सबैभन्दा धेरै झण्डै दश प्रतिशतका दरले कमाए भने जनउत्थान लघुवित्तका लगानीकर्ताले सबैभन्दा धेरै चार प्रतिशतका दरले गुमाए ।