प्राईम ब्याजदर बढाउने तेश्रो बैंक बनेको छ । प्राईमले जेठ २९ गतेदेखि लागू हुनेगरि एक बर्ष वा सोभन्दा बढी अवधिको मुद्धती निक्षेपमा बार्षिक १२ प्रतिशत ब्याजदर प्रदान गर्ने बताएको छ । यसका लागि न्यूनतम मौज्दात ५० हजार रुपैयाँदेखि मुद्धती खाता खोल्न सकिने बैंकले जनाएको छ ।
सोमबार मात्रै सिभिल बैंकले २२२ दिने मुद्धती खातामा १२.२२ प्रतिशत र चन्द्रसूर्य बचत खातामा १० प्रतिशत वार्षिक ब्याजदर प्रदान गर्ने योजना सार्वजनिक गरेको थियो । चन्द्रसूर्य बचत खातामा न्यूनतम १० हजार र मुद्धती बचतमा तीन लाख रुपैयाँ न्यूनतम मौज्दात हुनुपर्ने मापदण्ड सिभिलको छ ।
उता सोमबारदेखि नै एनआइसी एशिया बैंकले एक बर्ष अवधिको धनबर्षा मुद्धती खाताको निक्षेपमा प्रदान गरिने व्याजदर बढाएर १२ प्रतिशत पुर्याएको थियो । बैंकले भने न्यूनतम मौज्दातको सीमा तोकेको छैन ।
नेपाल बैंकर्स संघले सदस्य बैंकहरुका बीचमा व्याजदरका सम्बन्धमा यसअघि गरेको भद्र सम्झौता खारेज गरेपश्चात बैंकहरुबीच फेरी ब्याजदरमा प्रतिस्पर्धा चल्न थालेको हो । यसबाट निक्षेपमा लगानीकर्ताले उच्च ब्याजदर प्राप्त गरेपनि कर्जा लिनुपर्ने भने थप मारमा परेका छन् ।
बैंक तथा वित्तीय क्षेत्रमा बढ्दै गएको कर्जाको ब्याजदरले औद्योगिक उत्पादनमा संकुचन आउने भन्दै यसलाई तत्काल नियन्त्रण गर्नुपर्ने उद्याेगी व्यवसायीहरुको सुझाब छ । कर्जाको बढ्दो ब्याजदरले औद्योगिक क्षेत्रको प्रतिस्पर्धात्मक क्षमता घट्ने र रोजगारीका अवसरहरुमा समेत गिरावट आउने उनीहरु बताउँछन् ।