वाणिज्य बैंकहरुको छाता संगठनले केही समय अघि व्याजदर १२ प्रतिशतभन्दा बढी नजाने भनी गरेको सम्झौता तोडेपछि डेभलपमेण्ट बैंकर्स संघले १२ प्रतिशतभन्दा माथिको व्याजदर नदिने भद्र सहमति गरेका हुन् । मेरोलगानीसँग कुरा गर्दै संघका एक पदाधिकारीले भने, ‘वाणिज्य बैंक उत्ताउलो भएको महसुस आम सेवाग्राहीले गरिरहेका बेला हामी संयमित हुने प्रयत्न गरेका हौं ।’
उनका अनुसार सेवाग्राहीप्रति विकास बैंकहरुको भरोसा कायम राख्नका लागि यस्तो निर्णय गरिएको हो । संघको यो निर्णयले अर्थतन्त्रलाई सकरात्मक टेवा पुग्नुका साथै वाणिज्य बैंकहरुलाई चर्को व्याजदर सेवाग्राहीलाई नथोपर्न नैतिक दवाब पर्नेछ ।
आगामी आर्थिक वर्षको मौद्रिक नीति मार्फत केन्द्रीय बैंकले व्याजदरका सम्बन्धमा उचित निर्णय गरी एकरुपता कायम गर्नुपर्ने ती अधिकारीले बताए ।
‘अहिले व्याजदर बढेर बैंक चलाउन सहज भए पनि आम सेवाग्राही र समग्र अर्थतन्त्र यसको चपेटामा छ । हामीले यो अवस्था नआओस् भन्न व्याजदर नबढाउने निर्णय गरेका छौं, केन्द्रीय बैंकले पनि केही पहल गर्नेमा आशावादी छौं ।’
व्याजदरका सम्बन्धमा निर्णय हुनु पहिले नै देव विकास बैंकले साढे १२ प्रतिशत व्याजदर ल्याएको थियो । तर संघमा भएको सम्झौता अनुसार देवले केही दिनपछि उक्त व्याजदरमा परिमार्जन गर्ने बताइएको छ ।
