कम्पनीले आयोजना प्रभावित क्षेत्र इलाम नगरपालिका वडा नं १, ३ र ४ का लागि तीन लाख ७१ हजार ४०० कित्ता शेयर निष्काशन गरेको हो । लगानीकर्ताले इलाम जिल्लामा रहेको सिद्धार्थ बैंक, एक्सेल डेभलपमेन्ट बैंक र कन्काई विकास बैंकमार्फत आवदेन दिन सक्नेछन् ।
आइपिओमा न्युनतम ५० देखि अधिकतम १ हजार ८ सय कित्तासम्म आवेदन दिन पाउने व्यवस्था रहेको बिक्री प्रबन्धक सिद्धार्थ क्यापिटलले जनाएको छ । कम्पनीको इक्रा रेटिङ ’इक्रा एनपि आइपिओ ग्रेड ५’ रहेको छ । यस सूचकले कम्पनीको वित्तीय अवस्था कमजोर रहेको जनाउँछ ।
इलामको पुवाखोलामा तीन मेगावाट क्षमताको जलविद्युत आयोजना सञ्चालन गरिरहेको जोशी हाइड्रोपावरले पहिलो चरणमा स्थानीयलाई ३ करोड ७१ लाख ४० हजार रुपैयाँ बराबरको साधारण सेयर निष्काशन गरेको हो । स्थानीयलाई सेयर बाँडफाँड गरे पश्चात सर्वसाधारणका लागि दोस्रो चरणमा आईपिओ निष्काशन गर्ने कम्पनीले जनाएको छ ।
पहिलो आयोजनाको रुपमा ३ मेगावाटको अपर पुवा १ आयोजना सञ्चालनमा रहेको कम्पनीले २०७१ माघ १ गतेबाट उक्त आयोजनाबाट व्यवसायिक रुपमा विद्युत उत्पादन गर्दै आएको छ ।
आयोजना बनाउन ५५ करोड ३५ लाख रुपैयाँ लाग्ने अनुमान गरिएको छ । कम्पनीको जारी पूँजी ३७ करोड १४ लाख रुपैयाँ छ ।
कम्पनीमा संस्थापकको ५१ र ४९ प्रतिशत सर्वसाधारणको लगानी हुनेछ । स्थानीयलाई १० प्रतिशत आइपिओ बिक्री गरेपछि सर्वसाधारणलाई ३९ प्रतिशत आइपिओ निष्कासन गर्ने कम्पनीले जनाएको छ ।
