धितोपत्र बोर्डमा प्रिमियम मूल्यमा आइपिओ निष्काशन गर्ने अनुमति पाएको शिवम् सिमेन्ट्ले सार्वजनिक गरेको वित्तीय विवरण अनुसार आर्थिक बर्ष २०७१/७२ मा एक अर्ब २५ करोडको चुक्ता पूँजी रहेकोमा चालू आवको तेश्रो त्रैमास अर्थात चैत मसान्तसम्मा आइपुग्दा तीन गुणा बढी बढाएर ३ अर्ब ८७ करोड रुपैयाँ पुर्याएको देखिन्छ । कम्पनीले हरेक आवमा ५० प्रतिशत बढीले चुक्ता पूँजी बढाउँदै आएको छ ।
कम्पनीले आर्जन गरेको खुद नाफाको आधारमा हेर्ने हो भने आर्थिक बर्ष २०७१/७२ मा ४१ करोड ५३ लाख गरेको नाफालाई आर्थिक बर्ष २०७२/७३ मा ८७.२९ प्रतिशतले खुद नाफा बढाएर ७७ करोड ७८ लाख नाफा आर्जन गरेको देखिन्छ ।
आव २०७३/७४ मा आईपुग्दा भने अघिल्लो बर्षको जस्तो नाफा बढ्न सकेको छैन । उसको नाफा सामान्य रुपमा ४.३२ प्रतिशत मात्र बढेर ८१ करोड १४ लाख पुगेको छ । चालू आवको ९ महिना अवधिमा कम्पनीले ९३ करोड ६७ लाख खुद नाफा कमाएको छ । ९ महिना अवधिमा कमाएको नाफाको आधारमा अन्तिम त्रैमाससम्ममा कम्पनीले एक अर्ब २४ करोड हाराहारीमा नाफा गर्नसक्ने अनुमान गर्न सकिन्छ ।
कम्पनीको चुक्ता पूँजी बढेको अनुपातमा नाफा वृद्धि नहुँदा प्रतिसेयर आम्दानी भने कहिले बढ्ने, कहिले घट्ने त कहिले स्थिर रहेको देखिन्छ । आर्थिक बर्ष २०७१/७२ मा ३३ रुपैयाँ २३ पैसा प्रतिसेयर आम्दानी रहेको कम्पनीले आव २०७२/७३ मा १७ प्रतिशतले बढाएर ३८ रुपैयाँ ८९ पैसा पुर्याएको देखिन्छ ।
आर्थिक बर्षमा २०७३/७४ मा आईपुग्दा इपिएस १६.५६ प्रतिशतले घटेर ३२ रुपैयाँ ४५ पैसामा झरेको छ । चालू आवको ९ महिना अवधिमा कम्पनीको बार्षिक प्रतिसेयर आम्दानी ३२ रुपैयाँ २५ पैसा मै सीमित छ । चुक्ता पूँजीको वृद्धिको अनुपातमा कम्पनीले नाफा अनुपात बढाउन नसक्दा गत बर्षको तुलनामा इपिएस केही घटेकाे छ ।
कम्पनीले चालू आवको ९ महिनामा २ अर्ब ५२ करोड ४४ लाख रुपैयाँ सञ्चालन मुनाफा आर्जन गरेको देखिन्छ । गत आव २०७१/७२ मा एक अर्ब ४१ करोड सञ्चालन नाफा आर्जन गरेको कम्पनीले २०७२/७३ मा दुई अर्ब तीन करोड तथा २०७३/७४ मा दुई अर्ब ४५ करोड सञ्चालन नाफा गरेको थियाे ।
जगेडा कोषको आधारमा कम्पनीले आव २०७१/७२ मा २४ करोड ४५ लाख जगेडा सञ्चित थियाे । अर्काे अावमा ८९ करोड सात लाख, एक अर्ब ४९ करोड १४ लाख हुँदै २०७४ चैतसम्ममा २ अर्ब १६ करोड ४८ लाख रुपैयाँकाे जगेडा सञ्चित रहेको कम्पनीले प्रकाशित गरेको वित्तीय विवरणमा उल्लेख छ ।
कम्पनीले तीन बर्षमा गरेको प्रगति विवरण यस्तो छ :-
कम्पनीले उद्योग प्रभावित क्षेत्रका बासिन्दालाई प्रतिकित्ता ३ सय रुपैंयाँ दरमा ८ लाख ८० हजार कित्ता र सर्वसाधारणका लागि ४ सय रुपैयाँ दरमा ४४ लाख कित्ता आइपिओ जारी गर्न लागेको हो ।
कम्पनीले प्रिमियम सहित २ अर्ब २ करोड ४० लाख रुपैयाँ बराबरको आइपिओ जारी गर्नेछ । जसमध्ये सर्वसाधारणलाई एक अर्ब ७६ करोड तथा स्थानीलाई २६ करोड ४० लाख रुपैयाँको आइपिओ बिक्री गर्नेछ । आईपिओ विक्ती पश्चात कम्पनीको चुक्ता पूँजी ५२ करोड ८० लाख बढेर ४ अर्ब ४० करोड पुग्नेछ । कम्पनीले प्रिमियम बापत एक अर्ब ४९ करोड ६० लाख संकलन गर्नेछ ।
चार अर्ब लगानीमा सात वर्ष अघि स्थापना भएको शिवमले स्थानीय वासीन्दाका लागि जारी पूँजी ४ अर्ब ४० करोड रुपैयाँको २ प्रतिशत तथा सर्वसाधारणका लागि १० प्रतिशत गरी जारी पूँजीको १२ प्रतिशत साधारण सेयर विक्री गर्नेछ ।
बोर्डले धितोपत्र दर्ता तथा निष्काशन नियमावली, २०७३ मा पूँजी बजारमा वास्तविक क्षेत्रका कम्पनीलाई प्रवेश गराउन जारी पूँजीको न्यूनतम १० प्रतिशतमात्र सार्वजनिक निष्काशन गरे पुग्ने र प्रिमियम मूल्यमा सार्वजनिक निष्काशन गर्न सकिने सहुलियतपुर्ण व्यवस्था गरेपश्चात शिवमले आईपिओ जारी गर्न लागेको हो ।