गत आर्थिक वर्षको कमाईबाट १० प्रतिशत बोनस बितरण गरेर एभरेष्ट इन्स्योरेन्सले चुक्ता पूँजी १३ करोड ३६ लाख ५० हजार रुपैयाँ पुर्याएको छ । कम्पनीले १०५ प्रतिशतले हुने १४ करोड ३ लाख ३२ हजार रुपैंयाको संस्थापक हकप्रद बिक्री गरेर चुक्ता पूँजी २७ करोड ३९ लाख रुपैयाँ पुर्याउनेछ ।
इन्स्योरेन्सको गत आर्थिक वर्षको साधारण सभाले १०५ प्रतिशत हकप्रदका साथै सो पश्चात ३०० प्रतिशत हकप्रद निष्काशन गर्ने प्रस्ताव पारित गरिसकेको छ ।
उक्त योजना अनुसार एभरेष्टले संस्थापक हकप्रद बिक्री गरे लगत्तै ३०० प्रतिशत हकप्रद सेयर निष्काशनको प्रकृया अघि बढाउने छ ।
इन्स्योरेन्सको हकप्रद सेयर सिद्धार्थ क्यापिटलले निष्काशन गर्नेछ ।
१०५ प्रतिशत संस्थापक हकप्रद तथा ३०० प्रतिशत हकप्रद बिक्री गरे पश्चात इन्स्योरेन्सको चुक्ता पूँजी १ अर्ब ९ करोड ६० लाख हाराहारी पुग्नेछ ।
पहिलो पटक एभरेष्ट इन्स्योरेन्सले संस्थापक हकप्रद बिक्री गर्न लागेको हो । यस अघि बैंक अफ काठमाण्डूले संस्थापक एफपिओ बिक्री गर्ने प्रयास गरे पनि धितोपत्र बोर्डले त्यसलाई स्थगित गराएको थियो ।
एभरेष्टले यस अघि ६०० प्रतिशत हकप्रद धितोपत्र बोर्डमा स्वीकृतिका लागि पठाएको थियो । तर बीमा समितिको संस्थापक र साधारण सेयरधनीको हिस्सा ५१ अनुपात ४९ हुनैपर्ने व्यवस्थाले धितोपत्र बोर्डले एभरेष्टको हकप्रदलाई स्थगन गरेको थियो ।