प्रधानमन्त्री तथा मन्त्रिपरिषद् कार्यालयमा मन्त्री तथा सचिवहरुलाई छलफलमा बोलाएर प्रधानमन्त्रीले उक्त निर्देशन दिएका हुन् ।
प्रधानमन्त्री ओलीले आगामी साउन १ गतेदेखि सरकारको नीति र कार्यक्रम तथा आगामी आवको बजेट कार्यान्वयनमा ल्याउने गरी कार्ययोजना ल्याउन सचिव र मन्त्रीहरुलाई निर्देशन दिए ।
सरकारको मूल लक्ष्य आर्थिक समृद्धि र विकास भएकाले त्यसमा कुनै पनि सम्झौता हुन नसक्ने र जनतालाई केन्द्रमा राखेर योजनाबद्ध विकास हुनुपर्नेमा प्रधानमन्त्रीको जोड थियो ।
प्रधानमन्त्रीले भने, “सरकारको मूल लक्ष्यलाई कार्यान्वयन गर्न सबै निकायले उत्तिकै प्रभावकारी र योजनाबद्ध प्रयास गर्नुपर्छ । नेपाली जनताले वर्तमान सरकारबाट ठूलो अपेक्षा राखेका छन् । त्यो अपेक्षालाई पूरा गरिनुपर्छ ।”
सरकारको नीति तथा कार्यक्रम र बजेटलाई व्यवस्थित तथा योजनाबद्ध रुपमा समयमा नै परिणाम निकाल्ने गरी कसरी काम गर्न सकिन्छ भन्नेबारेमा प्रधानमन्त्रीले छलफल गर्नुभएको सञ्चारमन्त्री गोकुलप्रसाद बाँस्कोटाले बताए।
सरकारको नीति तथा कार्यक्रम र बजेटलाई कसरी प्रभावकारी रुपमा कार्यान्वयन गर्न सकिन्छ भन्नेबारेमा प्रधानमन्त्री ओलीले नियमित छलफल गरिरहेका छन् ।
सरकारले व्यवहारमै भ्रष्टाचारलाई शुन्य सहनशीलताको नीति अपनाएको भन्दै प्रधानमन्त्रीले भ्रष्टाचार, अनियमिततामा छुट दिन नसकिने बताए । उनले आर्थिक वर्ष २०७५÷७६ को बजेट कार्यान्वयनका लागि योजनाबद्ध, गतिशील र प्रभावकारी कार्ययोजना जरुरी रहेको उल्लेख गरे ।
प्रधानमन्त्री ओलीले आगामी साउन १ गतेदेखि नै बजेट पूर्णरुपले कार्यान्वयनमा जाने गरी लिखित कार्ययोजना प्रस्तुत गर्न सम्बद्ध मन्त्री र सचिवलाई निर्देशन दिएका छन् ।
सोही निर्देशनअनुसार मन्त्री र सचिवहरुले एकवर्षे तथा पञ्चवर्षीय मन्त्रालयगत कार्ययोजना र विकास निर्माणसम्बन्धी कार्यक्रम पेश गरेका छन् ।
प्रधानमन्त्रीले सरकारको नीति तथा कार्यक्रम र बजेट कार्यान्वयनका लागि अत्यावश्यक योजना र रणनीति, समस्या रहेका स्थानमा समाधानको उपायका बारेमा समेत सम्बद्ध अधिकारीसँग चासोपूर्वक छलफल गर्नुभएको मन्त्री बाँस्कोटाको भनाइ छ ।
साउत १ गतेदेखि लागू गरिने सरकारका सबै योजनाको व्यवस्थित र तोकिएको समयमा नै नतिजा आउने गरी कार्यान्वयन गर्ने विषयमा छलफल भएको मन्त्री बाँस्कोटाले जानकारी दिए ।