बिहीबार नेप्से ५.३८ अंकले ओरालो लागेर ११९३.३९ अंकमा झरेको छ । दिनभरको बजारमा कूल १६२ कम्पनीका ५६ करोड १२ लाख रुपैयाँ बराबरको सेयर किनबेच भएको छ ।
बजार घटेपनि कारोबार रकम अघिल्लो दिनको तुलनामा ३९ करोडले बढेको छ । प्राइम लाइफकै साढे ३० करोड बराबरको संस्थापक शेयरको किनबेच भएपछि कारोबार रकम उकासिएको हो । बुधबार १७ करोड बराबरको मात्र कारोबार भएको थियो ।
प्रार्इमपछि उच्च कारोबार गर्ने नबिल बैंककाे ३ करोड ३१ लाख बराबरको शेयर किनबेच भयो । नेपाल इन्स्योरेन्स साढे दुई करोड बराबरको कारोबार हुँदा प्रभु इन्स्योरेन्स र अरुण भ्यालीको कारोबार पनि करोड नाघ्यो ।
बिहीबारको बजारमा होटल र उत्पादन समूह बाहेक बाँकी सबै समूहको सूचक घटेको छ । होटल समूहको १४.६१ अंकले बढेको छ उत्पादनको सामान्य बढेको छ । सबैभन्दा बढी निर्जीवन बीमा समूहको सूचक ८० अंकले ओरालो लागेको छ । जीवन बीमा समूहको सूचक पनि ४३ अंकले घटेको छ ।
बजारमा सबैभन्दा बढी एनआईसी एशिया ग्रोथ फण्डको इकाई मूल्य ४.०३ प्रतिशतले बढेको छ । कर्णाली डेभलपमेन्ट, नेपाल कम्युनिटी तथा पोखरा फाइनान्सको पनि दुई प्रतिशतका दरले बढेको छ ।
नेपाल इन्स्योरेन्स, नेशनल हाइड्रो, सिनर्जी हाइड्रो तथा भार्गव विकास लगायतको शेयरमूल्य पाँच प्रतिशतले घटेको छ । भने नयाँ नेपाल लघुवित्त विकास बैंकको सेयर मूल्य सबैभन्दा धेरै ६.६७ प्रतिशतले घटेको छ ।
