बीमा समितिको तथ्याङ्क अनुसार बीमा कम्पनीहरुले कृषि तथा पशु बीमावाट ४१ करोड २० लाख रुपैयाँ बराबरको बीमा शुल्क संकलन गरेका छन् । गत आर्थिक वर्षको जेठ सम्ममा पशुपन्छी,अन्न बाली, तरकारी, फलफुल र माछाबाट साे रकम संकलन भएकाे हाे ।

पशुुपन्छी बीमावाट ३७ करोड ८५ लाख रुपैयाँ र अन्न बाली, तरकारी, फलफुल र माछावाट ३ करोड ३४ लाख रुपैयाँ गरी सो रकम बराबरको बीमा शुल्क संकलन भएको समितिले जानकारी दिएको छ ।

यस अवधिमा अन्नबाली बीमा अर्न्तगत ६४ लाख, तरकारी बीमाबाट ३१ लाख, फलफूल बीमावाट १ करोड, माछाबाट १ करोड ३९ लाख रुपैयाँ बीमा शुल्क संकलन भएको छ ।

यस्तै पशु बीमा मार्फत ३२ करोड २६ लाख रुपैयाँ र पन्छी बीमावाट ५ करोड ६० लाख रुपैयाँ बराबरको बीमा शुल्क संकलन भएको छ।

यस्तै कृषि बीमा गर्दा सरकारले प्रदान गर्न अनुदान रकम ३० करोड ९० लाख रुपैयाँ रहेको छ । सरकारले यस अवधिमा अन्नबाली बीमाका लागि ४८ लाख, तरकारी बीमाका लागि २३ लाख, फलफूल बीमाका लागि ७५ लाख, माछा बीमाका लागि १ करोड ४ लाख रुपैयाँ अनुदान दिएको छ ।

यस्तै पशु बीमाका लागि २४ करोड १९ लाख रुपैयाँ र पन्छी बीमाका लागि ४ करोड २० लाख रुपैयाँ बराबरको अनुदान रकम भुक्तानी गरेको छ ।

गत आर्थिक वर्षको जेठ सम्म कुल बीमाङ्क नौं अर्ब ४८ करोड ७८ रुपैयाँ रहेको छ । यस अवधिमा १६ करोड ६७ लाख रुपैयाँ बराबरको दाबी परेको छ ।

पछिल्लो समय नेपालमा कृषि बीमा प्रति आर्कषण बढ्दै गएको छ । बीमा समितिको उपनिर्देशक कुन्दन सापकोटाले कृषि बीमाको दायरा विस्तार हुँदै गएको बताए । उनले भने:-, 'पछिल्लो ५ बर्षको तथ्याङ्क केलाउँदा कृषि बीमाको दायरा क्रमिक रुपमा निरन्तर बढ्दै गएको छ ।’

कृषि बीमालाई थप विस्तार गर्न किसानहरुलाई बीमा सम्बन्धि सचेतनामूलक कार्यक्रममा जोड दिनुपर्ने उनको भनाई छ । इन्स्योरेन्स क्षेत्र टेक्निकल भएकोले आम सर्वसाधारणहहरुले बुझ्ने गरी बीमा हुँदा फाईदा र नहुँदाको बेफाईदाबारे बुझाउन पर्ने उनको भनाई छ ।

नेपालमा कृषि बीमा सञ्चालन भएको ६ वर्ष मात्रै भएको छ । कृषि बीमाका लागि सरकारले प्रिमियम शुल्कको ७५ प्रतिशत अनुदान ब्यहोर्दै आइरहेको छ । चालु आर्थिक वर्षको लागि विनियोजित बजेटले पनि कृषि बीमालाई प्राथमिकतामा राखेको छ । न्यून आय भएका किसानहरुलाई केन्द्रित गरी लघु कृषि बीमाका कार्यक्रमहरु समेत सञ्चालनमा रहेका छन् ।