बढेको बजारमा खरिद भन्दा बिक्री चाप बढ्दा सूचक ओरालो लागेको हो । यसले सोमबारबाट लय समात्न लागेको बजार मंगलबार नै बिक्री चाप बढ्दा भोलिका दिनमा कता जाला भन्ने अन्यौलता लगानीकर्तामा छाएको छ ।
शेयर लगानीकर्ता संघ नेपालका अध्यक्ष उत्तम अर्याल समग्र अर्थतन्त्रका सूचक राम्रो रहेको अवस्थामा बजार अस्थिर बन्नुमा सरकार र सेयर लगानीकर्ता बीचमा विश्वासको खडेरीलाई नै प्रमुख कारक तत्व देख्छन्।
अर्यालले भने:- 'अहिले सेयर बजारका लगानीकर्ता बजारले गति लिन खोज्यो कि त्यसबाट नाफा बुक गरेर भाग्न खोज्छन् । यसको प्रमुख कारण भनेको सरकारमाथि लगानीकर्ताको कन्फिडेन्स नहुनु हो ।'
'बजारमा नयाँ लगानीकर्ताको आगमन छैन भने पुरानो लगानीकर्तामा समेत दोधारमा रहेका छन् । मंगलबार अर्थमन्त्रीको राजिनामा आउने हल्लाले एकपटक बजार माथि उक्लियो र फेरी समान्य बढोत्तरीमा बन्द भयो । बजारमा मंगलबार देखिएको अर्थमन्त्री फोबियाको हाबीकाे कारण हो ।' अर्यालले भने ।
नेपाल इन्भेष्टर्स फोरमका कोषाध्यक्ष अञ्जिव तुलाधरले पनि बैंकको ब्याजदर घटेकाले पछिल्लो समय लगानीकर्तालाई केही राहत मिलेपनि सरकारप्रति लगानीकर्ता आवश्वत हुन नसकेको बताए ।
उनले मंगलबारको बजारमा अर्थमन्त्रीको राजीनामा आउने हल्लाले बजारमा उतार चढाव आएको बताउँदै हल्लाले बढोत्तरी आएकाले बजार करेक्सन भएको बताए ।
अनलाईन कारोबार प्रणालीको सुरुवातको प्रकृयामा रहेको, छिटो बैंकहरुलाई ब्रोकर इजाजत प्रदान गरेर नयाँ लगानीकर्ता बजार प्रवेश गराउन आवश्यक रहेको उनले बताए । अहिले बजार धेरै तल झरिसकेकाले थप नघट्ने तुलाधरको अनुमान छ ।
मंगलबार १६० कम्पनीका ११ लाख ८९ हजार ६८९ कित्ता सेयर २९ करोड ४१ लाख ८२ हजार रुपैयाँमा कारोबार भएको छ । नेप्से परिसूचक ४.७७ अंकले बढेर ११९९.२७ अंकमा बन्द भएको छ ।
यसदिन नबिल बैंक, नेपाल टेलिकम, नेपाल बैंक, र इन्भेष्टमेन्ट बैंकको एक करोड बढीको सेयर खरिदबिक्री भएको छ ।
सानिमा बैंक,मेगा बैंक, नेपाल इन्स्योरेन्स, सिभिल बैंक, एनएमबि बैंक र प्रभु इन्स्योरेन्स कम्पनी उच्च कारोबार हुने दश कम्पनीमा परेका छन् ।
कारोबारमा आएका ११ उप समूहमध्ये उत्पादन तथा प्रशोधन र लघुवित्तको इन्डेक्स् घटेको छ भने बाँकी सबै उप समूह बढेका छन् । होटलको सूचक सबैभन्दा बढी ४९.४२ अंकले बढेको छ भने जीबन बीमा २०.६१ अंक, निर्जिवन बीमा १९.८९ र बैंकिङ्ग इन्डेक्स् ५.२५ अंकले सकारात्मक रह्यो ।
मंगलबारको बजारमा पनि नयाँ नेपाल लघुवित्तको सेयरमूल्यमा सर्किट लागेको छ । मंगलबार नै बोनस घोषणा गरेको भार्गव विकास बैंकको सेयरमूल्य ९.६० प्रतिशतले बढ्यो । गोर्खा फाइनान्स, समीट माईक्रोफाइनान्स, सिद्धार्थ फाइनान्स र सिद्धार्थ इक्वीटी फण्डका इकाईधनीले पनि ५ प्रतिशत बढीले नाफा कमाएका छन् ।
उता बेष्ट फाइनान्सको सेयरमूल्य दश प्रतिशतले घटेको छ । वित्तीय विवरणमा नाफा बढ्नु बाहेक अन्य धेरै सूचक खराब देखिएपछि फाइनान्सको सेयरमूल्य ओरालो लागेको हो ।
त्यसैगरि प्रोगेसिभ फाइनान्सको सेयरमूल्व्य पनि ९.८६ प्रतिशतले घटेको छ भने नेशनल हाईड्रोपावर कम्पनीको सेयरमूल्य ४.७० प्रतिशतले घट्दा ८१ रुपैयाँमा झरेको छ ।
हिमालयन डिष्ट्रीलरी, नागवेली लघुवित्त युनाईटेड फाइनान्स,सेन्ट्रल फाइनान्स र लक्ष्मी भ्यालू फण्डका इकाईधनीले ३ प्रतिशत धेरैले गुमाएका छन् ।