चिलिमेले गत आर्थिक बर्षको अन्त्यसम्ममा ९३ करोड ८७ लाख खुद मुनाफा आर्जन गरेको छ । कम्पनीको नाफा अघिल्लो बर्षको तुलनामा एक प्रतिशत अर्थात १६ लाखले बढी हो । अघिल्लो बर्ष कम्पनीले ९३ करोड ७१ लाख खुद नाफा गरेको थियो ।
बिद्युत बिक्रीबाट भएको आम्दानी घटेपनि बैंक ब्याज आम्दानी बढेपछि चिलिमेको नाफा बढेको हो । गत असारमसान्तसम्म चिलिमेले एक अर्ब १३ करोड रुपैयाँ विद्युत बिक्रीबाट आम्दानी गरेको छ । अघिल्लो बर्ष यस्तो आम्दानी एक अर्ब १९ करोड थियो ।
कम्पनीको विद्युत बिक्रीको आम्दानी घटेपनि ब्याज आम्दानी भने ह्वात्तै बढेको छ । अघिल्लो बर्ष ब्याज आम्दानीबाट ३ करोड ९३ लाख कमाएको कम्पनीले गतबर्ष ६ करोड ८२ लाख आम्दानी गरेको छ । कम्पनीको विद्युत बिक्रीको आय ४.८८ प्रतिशतले घटेका अवस्थामा ब्याज आम्दानी ७३.३९ प्रतिशतले बढेको छ ।
कम्पनीको ब्याज आम्दानी बढ्नुका साथै प्रशासनिक खर्च घटेपछि विद्युत बिक्रीको आम्दानी घटेपनि खुद नाफा बढेको हो । अघिल्लो बर्ष ७ करोड ३५ लाख प्रशासनिक खर्च गरेको कम्पनीले गतबर्ष यस्तो खर्च घटाएर ४ करोड ६२ लाखमा सिमित गरेको छ ।
यता कम्पनीको विद्युत बिक्री लागतका साथै अन्य खर्च तथा प्रशासनिक खर्चमा समेत कमी आएको छ । त्यस्तै सरकारलाई तिर्नुपर्ने कर तथा कर्मचारी बोनस व्यवस्थाको रकम भने बढेको छ ।
तीन अर्ब ९६ करोड चुक्ता पूँजी रहेको कम्पनीको प्रतिसेयर आम्दानी २३ रुपैयाँ ६८ पैसा कायम भएको छ । जसको. जगेडा कोषमा चार अर्ब ९८ करोड छ । चिलिमेको प्रतिशेयर नेटवर्थ २२५ रुपैयाँ र मूल्य आम्दानी अनुपात ३३.३७ गुणा रहेको छ ।
कम्पनीको २७० मेगावाट बराबरका चार आयोजना निमार्णका क्रममा रहेका छन भने त्यस्तै कम्पनीले सर्वेक्षण अनुमति पाएका १५६ मेगावाटको सेतीनदी ३ र ४२० मेगावाट क्षमताको बुढीगण्डकीको काम अघि बढाउन चुनौती छ ।
कम्पनीमा नेपाल विद्युत प्राधिकरणको ५१ प्रतिशत र सर्वसाधारणको ४९ प्रतिशत हिस्सा रहेको छ । जसमध्ये १० प्रतिशत स्वामित्व स्थानियको रहेको छ । यस कम्पनीको सहायक कम्पनीहरुमा रसुवागढी हाइड्रोपावरमध्ये भोटेकोशी जलविद्युत कम्पनी र सान्जेन जलविद्युत कम्पनी रहेका छन् ।