दर्जनौं सोलार आयोजना पिपिएको लाइनमा रहेको प्राधिकरण विद्युत व्यापार विभागका प्रमुख प्रबल अधिकारीले बताए ।
अपि पावर कम्पनी लिमिटेडले निर्माण गर्ने २ सौर्य विद्युत आयोजनाको पिपिए गरेको छ । कम्पनीले पर्साको परवानीपुरमा ८ मेगावाट र रौतहटको चन्द्रनिगाहपुरमा ४ मेगावाटको सोलार प्लान्ट विकास गर्नेछ । यी आयोजनासँग प्रतियुनिट ७ रुपैंया ३० पैसामा २५ वर्षका लागि पिपिए भएको छ । पिपिएमा प्राधिकरण योजना अनुगमन तथा सूचना प्रविधि निर्देशनालयका उपकार्यकारी निर्देशक जगदिश्वरमान सिंह र कम्पनीका प्रबन्ध निर्देशक सञ्जिव न्यौपानेले हस्ताक्षर गरेको विज्ञप्तीमा उल्लेख छ ।
उत्पादित विद्युत परवानीपुरको ११ केभी परवानीपुर र चन्द्रनिगाहपुरको ३३ केभी सबस्टेसनमा जोडिनेछ । अबको १० महिनाभित्र प्राधिकरणको सबस्टेसन नजिक विद्युत उत्पादन गरी जोड्ने बताइएको छ ।
कम्पनीले सिमरा र ढल्केबरमा निर्माण गर्ने २ मेगावाटका आयोजनाको पनि एक साताभित्र पिपिए हुने तयारी छ । अपिले रिडी पावर कम्पनी सहित प्राधिकरण सबस्टेसन नजिक सौर्य विद्युत जडान गर्न खुल्ला प्रतिस्पर्धाबाट १० स्थानको अनुमति लिएको छ ।
सरकारले २०७२ फागुनमा घोषणा गरेको ९९ बुँदे ‘ऊर्जा संकट निवारण तथा विद्युत विकास दशक’ सम्बन्धी कार्ययोजनामा प्रतियुनिट ९ रुपैंया ६१ पैसादेखि ८ रुपैंया ४५ पैसा ‘बेन्चमार्क’ तोकी पिपिए आह्वान गरेको थियो । तर, ऊर्जा, जलस्रोत तथा सिँचाइ मन्त्रालयले तयार गरेको ‘ग्रिड कनेक्टेड सौर्य विद्युत विकास सम्बन्धी कार्यविधि २०७४’ लागू भएपछि सोलार पिपिएको दर प्रतियुनिट ७ रुपैंया ३० पैसा कायम गरिएको थियो ।