दोस्रो बजार कारोवारसम्बन्धी विभिन्न परिसूचकहरुको गणना तथा सार्वजनिकरुपमा प्रकाशन गर्ने प्रकृयालाई थप प्रभावकारी बनाउन यस्तो निर्देशन दिइएको बोर्डको दाबी छ । २०६५ सालभन्दा पहिले नेप्से सूचकांक तथा बजार पूँजीकरण र २०६५ देखि सेन्सेटिभ सूचकांक, सेन्सेटिभ बजार पूँजीकरण, सूचीकृत कम्पनीहरुको समूहगत मूल्य सूचकांकहरु समेत गणना तथा प्रकाशन गरी बजारलाई सुसूचित गराउँदै आएकोमा त्यसलाई थप व्यवस्थित बनाउनु पर्ने बोर्डको भनाई छ ।
नेप्से सूचकांकमा गैरकारोबारीय शेयरको रुपमा रहेका झण्डै ६५ प्रतिशत संस्थापक शेयर र सर्वसाधारणसँग रहने ३५ प्रतिशत कारोबारीय सेयरका आधारमा गणना हुने परिसूचकहरु तथा बजार पूँजीकरणलाई यथावतरुपमा दैनिक प्रकाशन गरी निरन्तरता दिन बोर्डले नेप्सेलाई भनेको छ । यस क्रममा फ्लोट बजार पूँजीकरणलाई महत्वका साथ सम्प्रेषण गर्न भनिएको छ ।
लगानीकर्तालाई धितोपत्रको दोस्रो बजारमा हुने हरेक कारोबार दिनको अन्तिम बिन्दूको मात्रै सूचकांक दिने अहिलेको व्यवस्थामा परिमार्जन गरी नेप्से र फ्लोट सूचकांकको शुरु, उच्चतम, न्यून र औसतको समेत नियमित जानकारी गराउनु पर्ने भएको छ । कारोबार भएका सूचीकृत कम्पनीहरुको शेयर कारोबारको शुरु, उच्चतम, न्युूनतम, अन्तिम र तिनीहरुको औसत समेतको सार्वजनिकरुपमा जानकारी दिने व्यवस्था मिलाउन बोर्डले नेप्सेलाई भनेको छ ।
बोर्डको निर्देशनको पूर्ण पाठ यस्तो छ ।
