राष्ट्र बैंकको निर्देशन अनुसार पूँजी बढाएका बैकहरुले निक्षेप र कर्जा परिचालन पनि बढाउँदै लगेका छन् । तर अधिकांश बैंकहरुको निक्षेप संकलनको भन्दा कर्जा विस्तारको अनुपात बढी देखिएको छ । निक्षेप र कर्जा दुवैको ब्याजदर बढेपनि कर्जामा लिने र निक्षेपमा दिने ब्याज अन्तर (स्प्रेड) दर बढाएका कारण अधिकांश बैंकहरु नाफा बढाउन सफल भएका छन् ।
चार बैंकको नाफा घट्यो
२७ वाणिज्य बैंकहरुमध्ये चार बैंक बाहेक सबैको नाफा बढेको छ । नेपाल क्रेडिट एण्ड कमर्स (एनसिसी) बैंक, प्रभु बैंक, नेपाल बङ्गलादेश (एनबी) बैंक र माछपुच्छ्रे बैंकले नाफा घटेको वित्तीय विवरण सार्वजनिक गरेका छन् ।
बैंकहरुले गरेको नाफाको रकमका आधारमा नबिल बैंकले सबैलाई उछिनेको छ । नबिलले ४ अर्ब ५ करोड रुपैयाँ नाफा गरेको छ। सबैभन्दा कम सिभिल बैंकको ६४ करोड ५० लाख छ । तर नाफा वृद्धिदरको हिसाबले सिभिल बैंकले सबैलाई पछि पारेको छ । सिभिलको नाफा अघिल्लो बर्षको तुलनामा ८५ प्रतिशतले बढेको हो ।
२३ बैंक अर्बपति क्लबमा
नबिल बैंक चार अर्ब बढी नाफा कमाउने एक मात्र बैंक बनेको छ । कृषि विकास, इन्भेष्टमेन्ट र नेपाल बैंक तीन अर्ब बढी नाफा कमाउने बैंकमा दरिएका छन् । एभरेष्ट, हिमालयन,ग्लोबल, स्टाण्डर्ड चार्टर्डको नाफा दुई अर्ब माथि रहेकाे छ । गत बर्षको नाफाको आधारमा सिटिजन्स बैंक, जनता, सेञ्चुरी र सिभिल बाहेक २३ बैंक अर्बपति क्लबमा परेका छन् ।
२७ वाणिज्य बैंकको नाफा ४८ अर्ब ७४ करोड, निक्षेप भन्दा कर्जा प्रवाहदर ज्यादा
