झण्डै एक महिनापछि कारोबार रकम ४५ करोड माथि 
नयाँ आर्थिक बर्षको सुरुवातसँगै सुस्त बनेको सेयर बजारमा झण्डै एक महिनापछि बिहीबार आधा अर्ब नजिक कारोबार भएको छ । गत साउन गते ३ गते ५६ करोडको कारोबार भए यता विहीबार भएको कारोबार दोस्रो ठूलो कारोबार हो । बिहीबार ४५ करोड ५२ लाख बराबरको सेयर खरिद बिक्री भएको छ ।

बुधबार झण्डै २९ अंकले बजारमा सुधार आउँदा लगानीकर्ता कारोबारमा संलग्न हुन थालेका छन् । वाणिज्य बैंक सहित धेरै सूचीकृत कम्पनीहरुले प्रगति विवरण प्रकाशित गरेपछि कम्पनी हेरेर लगानीकर्ताले बजारमा लगानी बढाउन थालेका छन् ।

महिनाको अन्त्य भएकाले पनि म्युचुअल फण्डले सेयर बजारमा लगानी बढाउन थालेकाले पनि कारोबार उत्साह जनक बनेको आंकलन गरिएको छ ।

सेयर बजारमा कारोबार गर्दै आएका वेदनाथ घिमिरे बुधबार उच्च उछाल आएकाले कतिपय नाफा बुक गर्न लागेकाले बिहीबार बजार अपेक्षित बढ्न नसकेको बताउँछन् । 

निकै उतार चढावपूर्ण कारोबार भएको बिहीबारको बजारमा कारोबारको आधा घण्टामा नेप्से ९ अंकमाथि उक्लेपनि घट्दै बढ्दै गर्दा अन्त्यमा ०.६१ अंकको झिनो सुधार सहित बन्द भएको छ । नेप्से सकरात्मक रहेपनि 'क' वर्गको कम्पनीको सूचक मापक सेन्सेटिभ इन्डेक्स् ०.०२ अंकले ऋणात्मक बनेको छ ।

६० कम्पनीको सेयर मूल्य बढ्याे

कूल १६६ कम्पनीको १३ लाख ६१ हजार ६२७ कित्ता सेयर कारोबार भएकोमा ८७ कम्पनीको सेयर मूल्य घटेको छ भने ६० कम्पनीको सेयरमूल्य बढेको छ । १९ कम्पनीको सेयरमूल्य स्थिर रह्यो । बैंकिङ्ग समूहमा १८ करोड ८३ लाख, निर्जीवन बीमाको पाँच करोड ६६ लाख र लघुवित्त समूहमा पाँच करोड १६ लाख बढीको कारोबार भएको छ ।

बैंकिङ्ग र उत्पादन समूह सकारात्मक

कारोबारमा आएका एघार उप समूह बैंकिङ्ग र उत्पादन समूह मात्र सकारात्मक बने । बाँकी सबै उप समूह घटेका छन् । उत्पादन तथा प्रशोधनमा ७७.३२ अंकले उछाल आउँदा बैंकिङ्ग ४.१० अंकले उकालो लागेको छ ।

जीवन बीमा २९.८७,होटल २७.२५,निर्जीवन बीमा २०.७७, जलविद्युत १६.७७ र लघुवित्तको सूचक १३.७८ अंकले ओरालो लागेका छन् । व्यापार, अन्य, वित्त र विकास बैंक सिङ्गल डिजिटले ऋणात्मक रहे ।

काराेबारमा वाणिज्य बैंकहरुकाे प्रभुत्व कायमै

बिहीबारको बजारमा पनि वाणिज्य बैंकहरुको कारोबार धेरै भएको छ । शिर्ष १० कम्पनीमा ६ वटा वाणिज्य बैंक परेका छन् भने इन्भेष्टमेन्ट बैंकको संस्थापक सेयर सबैभन्दा धेरै एक करोड ८९ लाख रुपैयाँको कारोबार भयो । एनएमबि बैंक, नबिल बैंक, राष्ट्रिय बीमा कम्पनीको संस्थापक, नेपाल बैंक, नबिल बैंक संस्थापक, प्राइम कर्मर्सियल बैंक, बोटलर्स नेपाल तराई र नेपाल लाईफ इन्स्योरेन्सको एक करोड बढीको सेयर खरिद बिक्री भएका छन् ।

बोटलर्स नेपाल तराईले कमाउँदा ललितपुर फाइनान्स गुमाउनेमा

उल्लेख्य प्रगति गरेपश्चात बोटलर्स नेपाल तराईको सेयरमूल्य ८.१० प्रतिशतले बढेर ६ हजार ७५ रुपैयाँ पुगेको छ । युनिलिभर नेपाल, कर्पोरेट डेभलपमेन्ट बैंक र राष्ट्रिय बीमा कम्पनीको संस्थापक सेयरधनीले पाँच प्रतिशत बढीले नाफा कमाएका छन् ।

उता ललितपुर फाइनान्स कम्पनीको सेयरधनीले ९.५८ प्रतिशतले गुमाउँदा हिमालयन डिष्ट्रलरीको सेयरमूल्यमा साढे ७ प्रतिशतले ह्रास आएको छ ।