चार अर्ब ३२ करोड लाभांश क्षमता
नेपाल फाइनान्सिङ रिर्पोटिङ्ग स्टाण्डर्ड (एनएफआरएस) अनुसार शुक्रबार बैंकले प्रकाशित प्रकाशित गरेको आर्थिक बर्ष २०७४/७५ को चौथो त्रैमासको वित्तीय विवरण अनुसार बैंकको लाभांश क्षमता चार अर्ब ३२ करोड ८७ लाख पुगेको छ ।
अघिल्लो आर्थिक वर्षमा दुई अर्ब ७७ करोड ६३ लाख लाभांश क्षमता रहेको बैंकले ५५.९२ प्रतिशतले लाभांश क्षमता बढाएको हो । यसअघि नबिलले चार अर्ब पाँच करोड लाभांश क्षमता बनाएको थियो ।
गत आर्थिक वर्षमा राष्ट्रिय बैंकले चार अर्ब ८९ करोड ९७ लाख रुपैयाँ नाफा कमाएकोमा राष्ट्र बैंकको व्यवस्था अनुसार ५७ करोड ०९ लाख रेगुलेटरी एड्जस्टमेन्ट पश्चात बैंकले सो लाभांश क्षमता बनाएको हो । वाणिज्य बैंकमध्ये उच्च लाभांश क्षमता बनाएपनि सर्वसाधारणमा सेयर जारी नभएका कारण बैंकको प्रगति हेरेर सेयर बजारका लगानीकर्ता लोभिनुको विकल्प भने छैन ।
प्रतिसेयर आम्दानी ४८ रुपैयाँ ०७ पैसा
एनआईडिसीलाई प्राप्तीपश्चात बैंकको चुक्ता पूँजी ९ अर्ब ४७ लाख रुपैयाँ पुगेको छ । बजारमा बैंकको सेयर नभए पनि प्रतिसेयर आम्दानी केलाउँदा झण्डै ४८ रुपैयाँ ०७ पैसा हुन आउँछ । अघिल्लो आर्थिक वर्षमा रहेको ३.७७ प्रतिशत खराब कर्जा अनुपात बैंकले घटाउन सकेको छैन ।
एनएफआरएस अनुसार बैंकको जगेडा कोषमा १३ अर्ब ९ करोड ९८ लाख रुपैयाँ सञ्चित छ । एक बर्षमा बैंकले ६ अर्ब ३९ करोड ९४ लाखले जगेडा सुधार गरेको छ । बैंकको प्रतिसेयर नेटवर्थ २४५ रुपैयाँ ४८ पैसा रहेको छ ।
वाणिज्य बैंकहरूमध्ये सबैभन्दा बढी निक्षेप संकलन र कर्जा लगानी
बैंकले एक खर्ब ६९ अर्ब ३३ करोड ७० लाख निक्षेप संकलन तथा एक खर्ब २४ अर्ब ४२ करोड ३४ लाख कर्जा लगानी गरेको छ । वाणिज्य बैंकमध्ये बैंकको निक्षेप संकलन र कर्जा प्रवाह बढी हो । दोस्रो ठूलो एनआईसी एशियाले एक खर्ब ५१ करोड निक्षेप संकलन गरेर एक खर्ब २१ करोड कर्जा प्रवाह गरेको छ ।
कर्जा १३ प्रतिशत र निक्षेप संकलन ९.८९ प्रतिशतले बढाएर १० अर्ब पाँच करोड ९० लाख खुद ब्याज आम्दानी आर्जन गरेको छ । बैंकको खुद ब्याज आम्दानी ४०.१८ प्रतिशतले बढेको हो ।
बैंकको कर्जा निक्षेप अनुपात ६६.८४ प्रतिशत, कोषको लागत २.२१ प्रतिशत तथा आधार ब्याजदर ६.२० प्रतिशत रहेकाले बैंकबाट सस्तो ब्याजदरमा कर्जा उपलब्ध गराउने क्षमता रहेको छ ।
प्रगति हेर्ने अनि चित्त बुझाउने मात्र
सेयर बजारमा नआएको र सरकारी स्वामित्वमा रहेर राम्रो प्रगतिको बाटो समातेको बैंकको सेयर निष्काशन नै नभएकाले सेयर बजारका लगानीकर्ताले प्रगति हेर्ने अनि चित्त बुझाउने बाहेक अरु के नै छ र । एनआईडिसीलाई प्राप्ती गरेको बैंकमा एजआईडिसी तर्फको ३० हजार ९१० कित्ता सेयर मात्र सर्वसाधारणको रहेको छ ।