राष्ट्र बैंकका अनुसार बैंक तथा वित्तीय क्षेत्रमा तरलताको उतारचढाबको स्थिति रहेको र निक्षेप संकलनको तुलनामा कर्जा प्रवाहको अनुपात बढेकाले वित्तीय अवस्था कसिलो रहेको जनाएको छ ।
मुलुकको वित्तीय अवस्था अझै कसिलो
राष्ट्र बैंकका अनुसार अघिल्लो आर्थिक बर्षको तुलनामा गत आर्थिक बर्षमा कर्जा प्रवाह २२.५ प्रतिशतले बढेको छ भने निक्षेप संकलन निक्षेप १९.२ प्रतिशतले मात्र बढेको छ ।
यसले मुलुकको वित्तीय अवस्था अझै कसिलो आवस्थामा रहेको देखाउँछ राष्ट्र बै.कले भनेको छ ।
साथै राष्ट्र बैंकले विप्रेषण आप्रवाहको वृद्धिदर र पूँजीगत खर्चको अवस्थाले आगामी समयमा वित्तीय स्थितिको दिशा निर्धारण गर्ने पनि उल्लेख गरेको छ ।
आर्थिक गतिविधि विस्तारका लागि सकारात्मक वातावरण
पछिल्लो राष्ट्रिय तथा अन्तर्राष्ट्रिय आर्थिक स्थिति एवम् मौसमी अवस्थामा भएको विकास क्रमले आर्थिक वर्ष २०७५/७६ मा देशको समग्र आर्थिक परिदृश्य मिश्रित रहने प्रक्षेपण केन्द्रिय बैंकको छ ।
राष्ट्रिय अर्थतन्त्रतर्फ, निर्वाचन सम्पन्न भएको, तीनै तहका सरकारहरु गठन भई बजेट समेत कार्यान्वयनमा आइसकेकाले आर्थिक गतिविधि विस्तारका लागि सकारात्मक वातावरण सृजना भएको छ ।
त्यसैगरी, समयमै पर्याप्त मनसुनी वर्षा भएको कारण कृषि क्षेत्रको वृद्धि उच्च रहने देखिएकाले अघिल्ला वर्षहरुको उत्साहजनक आर्थिक वृद्धिले आर्थिक वर्ष २०७५/७६ मा पनि निरन्तरता पाउने विश्वास राष्ट्र बैंकले लिएको छ ।
मुद्रास्फीतिमा चाप पार्न सक्ने जोखिम
अघिल्लो वर्षको ४.५ प्रतिशतको तुलनामा औसत उपभोक्ता मुद्रास्फीति ४.२ प्रतिशत रहेपनि विश्व मुद्रास्फीति स्थिति लगायत विदेशी विनिमय दरमा देखिएको उतार–चढावले मुद्रास्फीतिमा चाप पार्न सक्ने जोखिम रहेको राष्ट्र बैंकको भनाई छ ।
शोधनान्तर ९६ करोडले बचतमा
आर्थिक वर्ष २०७४/७५ मा चालू खाता घाटा थप विस्तार भई रु.२४५ अर्ब (कुल गार्हस्थ्य उत्पादनको ८.२ प्रतिशत) पुगेको छ । अघिल्लो वर्ष यस्तो घाटा रु.१० अर्ब (कुल गार्हस्थ्य उत्पादनको ०.४ प्रतिशत) रहेको थियो । आर्थिक वर्ष २०७४/७५ मा देशको समग्र शोधनान्तर रु.९६ करोडले बचतमा छ ।
