नेपाल राष्ट्र बैंकले सार्वजनिक गरेको आर्थिक वर्ष २०७४/७५ को बार्षिक तथ्यांकमा आधारित देशको वर्तमान आर्थिक तथा वित्तीय स्थितिको प्रतिबेदन अनुसार कुल ७५३ स्थानीय तह मध्ये २०७५ असार सम्ममा ६३१ स्थानीय तहमा मात्रै वाणिज्य बैंक पुगे पछि १२२ स्थानीय तह बैंक विहिन भएको हो ।
२०७४ असार सम्ममा २९६ स्थानीय तहमा मात्रै बैंकको उपस्थिति रहेको थियो । २०७५ असार सम्ममा ३३५ थप शाखा विस्तार भएर ६३१ स्थानीय तहमा पुगेको हो ।
सबै भन्दा धेरै प्रदेश नम्बर २ मा
सबै भन्दा धेरै प्रदेश नम्बर २ मा वाणिज्य बैंकहरुको उपस्थिति रहेको छ । जम्मा १३६ स्थानीय तह रहेको यस प्रदेशमा ७५ थप शाखा विस्तार भएपछि १२२ स्थानीय तहमा विस्तार भएको छ ।
१०९ स्थानीय तह रहेको प्रदेश ५ मा ९९ तहमा वाणिज्य बैंकको उपस्थिति रहेको छ । प्रदेश ५ मा १० स्थानीय तहमा शाखा विस्तार गर्न बाँकी छ । यस्तै गण्डकी प्रदेशमा ११, प्रदेश ३ को १२, प्रदेश २ को १४, प्रदेश १ को २५, कर्णलीको २५ र प्रदेश ७ को २५ स्थानीय तहमा बैंकको शाखा विस्तार गर्न बाँकी छ ।
राष्ट्र बैंकको तथ्यांकअनुसार २०७५ असार सम्ममा बैंक तथा वित्तीय संस्थाहरुको शाखा छ हजार ६५१ वटा पुगेको छ । यस अवधिमा वाणिज्य बैंकको तीन हजार २३, विकास बैंकको ९९३, वित्त कम्पनीको १८६ र लघुवित्त वित्तीय संस्थाको दुई हजार ४४९ वटा शाखाहरु रहेको छ । २०७४ असार सम्ममा बैंक तथा वित्तीय संस्थाहरुको शाखा संख्या पाँच हजार ६८ वटा थियो ।
२०७५ असार सम्ममा बैंक तथा वित्तीय संस्थाहरुको संख्या १५१ पुगेको छ । पूँजी बृद्धिका लागि बैंक तथा वित्तीय संस्थाहरुले मर्जर एक्विजिशन पश्चात विकास बैक तथा वित्त कम्पनीको संख्या घटेको छ । तर लघुवित्त वित्तीय संस्थाहरुको संख्या भने १२ वटाले बढेको छ ।