पहिलो चरणमा असार २२ गतेदेखि साउन २२ गतेसम्म आयोजना प्रभावित क्षेत्र म्याग्दीको अन्नपूर्ण गाउँपालिकाका स्थानीयको लागि ५ लाख कित्ता आईपिओ जारी गरेको थियो । तर स्थानीयले कम्पनीको सेयर ९४ हजार २३० कित्ता अर्थात करिब ९ प्रतिशत खरिद गरेका छन् ।
तीन बर्षसम्म बिक्री गर्न नपाइने र लामो समय लाभांश नपाइने भएकाले पछिल्लो समय स्थानीयलाई जारी हुने जलविद्युत कम्पनीहरुको सेयर बिक्री हुन छाडेको हो ।
स्थानीयलाई खुला गरेको चार लाख ५५ हजार ७७० कित्ता अवितरित भएपश्चात कम्पनीले सो समेत थप गरि सर्वसाधारणमा १५ लाख ५५ हजार ७७० कित्ता सेयर जारी गर्ने भएको छ । यसअघि सर्वसाधारणमा ११ लाख कित्ता जारी गर्ने तय भएको थियो ।
कम्पनीको धितोपत्र निष्काशन तथा बिक्री प्रवन्धकमा भिवोर क्यापिटल लिमिटेड रहेको छ । कम्पनीको आईपिओलाई इक्रा नेपालले ग्रेड फोर रेटिङ्ग प्रदान गरेको छ । यसले कम्पनीको अवस्था औसतभन्दा कमजोर रहेको जनाउँछ ।
कस्तो छ कम्पनी ?
५५ करोड रुपैयाँ जारी पूँजी रहेको आयोजनामा संस्थापकको ७० प्रतिशत अर्थात ३८ करोड ५० लाख लगानी रहेको छ । आयोजना प्रभावित स्थानीयबासिन्दा र सर्वसाधारणको गरि ३० प्रतिशत अर्थात १६ करोड ५० लाख रुपैयाँ लगानी रहने छ ।
कूल ९४ करोड रुपैयाँ लागत अनुमान गरिएको ५ मेगावाटको घलेम्दी जलविद्युत आयोजना म्याग्दीको अन्नपूर्ण गाउँपालिका–४ नारच्याङमा निमार्ण भइरहेको छ । कम्पनीले आगामी असोजदेखि बिजुली उत्पादन गर्ने लक्ष्य लिएको छ ।
वि.सं २०७१ देखि शुरु भएको आयोजनाको पूर्वाधार निर्माणको काम अन्तिम चरणमा पुगेको हो । प्रति मेगावाट लागत १८ करोड ८० लाख रुपैयाँ पर्ने यो आयोजनाले ८ वर्षसम्म कर्जा चुक्ता गर्ने कम्पनीले जनाएको छ । यसअनुसार कम्पनीमा सेयर लगानी गर्ने सेयरधनीले कम्तिमा ९ बर्ष लाभांशका लागि सेयर पाल्नुपर्ने देखिन्छ ।