बुधबार पूँजी बजार लगानीकर्ता संघका प्रतिनिधिसँगको भेटमा अर्थमन्त्री खतिवडाले हकप्रद र बोनस शेयरमा पूँजीगत लाभकर लगाउने विषयको अन्योलता एक हप्ताभित्र अन्त्य गरिने दाबी समेत गरेको संघका महासचिव एसपि चौलागाईले मेरोलगानीलाई जानकारी दिए ।
अर्थमन्त्री डा. युवराज खतिवडाले वाणिज्य बैंकलाई ब्रोकर लाइसेन्स दिएपछि पुँजी बजारको पहुँच देशका ७७ वटै जिल्लामा पुग्ने र शेयरबजार देशव्यापी रुपमा विस्तार हुने बताए ।
अहिले बैंकहरुसँग ब्रोकेज सेवाका बिषयमा छलफल भईरहेको बताउदै अर्को सहायक कम्पनी खोलेर उनीहरुलाई ब्रोकरको काम दिने तयारी सरकारले थालेको समेत जानकारी गराए । उनले सेयरबजारको विकास र विस्तारका लागि आफु भाषण भन्दा काम गरेर देखाउन प्रयत्नसील रहेको समेत लगानीकर्तालाई बताए ।
लगानीकर्ताहरुले दोस्रो बजारलाई लगानी र प्रविधिमैत्री बनाउन, गैरआवासीय नेपाली संघ (एनआरएनए) लाई पूँजी बजारमा भित्र्याउने वातावरण बनाउन अर्थमन्त्री समक्ष माग गरेका थिए ।
साथै उनीहरुले नियमित रुपमा बजार घट्दा लगानीकर्ताको घाटा बढ्दै गएको र दोस्रो बजार खस्किदा आईपिओ तथा एफपिओ समेत बिक्री हुन छाडेको भन्दै चिन्ता व्यक्त गरेका थिए ।