उद्योगलाई कुन ‘मोडालिटी’ मा सञ्चालन गर्ने भन्ने विषयमा छलफल भइरहेको मन्त्री खतिवडाले जानकारी गराए ।
उद्योग पुनः सञ्चालनका लागि अध्ययन गर्न गठित उद्योग मन्त्रालयअन्तर्गतको अध्ययन टोलीले सो उद्योग पुनः सञ्चालन गर्न नहुने सुझाव दिएको थियो । तर सरकारले भने सो उद्योग पुनः सञ्चालनमा ल्याउने प्रतिबद्धता जनाएको छ ।
०७१ चैत २६ यता उद्योगले टायर उत्पादन गर्न सकेको छैन । गोरखा नगरपालिका ७ को देउरालीमा ६ सय ८२ रोपनी क्षेत्रफलमा उद्योग छ । कारखानामा २ सय ४१ मजदुर–कर्मचारी छन।उद्योगको उत्पादन ठप्प भएदेखि कर्मचारीहरूले तलबसमेत पाउन सकेका छैनन् । तर ती कर्मचारीले कार्यालयमा उपस्थिति हाजिर भने लाउने गरेका छन् ।
कर्मचारी, तलब–भत्तासहित उद्योगको सञ्चित नोक्सानी १ अर्ब ६० करोड रुपैयाँ नाघिसकेको छ । तत्काल उद्योग सञ्चालन गर्न कम्तीमा ५५ करोड रुपैयाँ आवश्यक पर्ने अनुमान उद्योग मन्त्रालयको छ । मेसिन अपग्रेड गर्न मात्र २ अर्ब ३० करोड रुपैयाँ लाग्ने अनुमान गरिएको छ ।
चीन सरकारको सहयोगमा निर्माण भएको सो उद्योगले मुलुकमै पहिलोपटक ०४९ मंसिर २९ मा टायर उत्पादन थालेको थियो ।
नेपाल व्यापार तथा निकासी प्रवद्र्धन केन्द्रका अनुसार गत आर्थिक वर्षमा भारतबाट मात्रै करिब चार अर्ब बराबरको टायर आयात भएको छ । भारतपछि नेपालमा ब्राजिल, इजिप्ट, टर्की, थाइल्यान्ड, चीन र जापानमा निर्मित टायर भित्रने गरेका छन् ।
