मंगलबार अर्थमन्त्रलयमा आयोजना गरिएको पत्रकार सम्मेलनमा अर्थमन्त्री डा. युवराज खतिवडाले बाँकी स्थानीय तहमा पनि अभौतिक रुपमा भएपनि बैंकिङ्ग सेवा विस्तार गर्ने बताएका हुन् । उनले शाखा नपुगेका स्थानीय तहमा मोबाइल बैकिङ लगायतका सेवाहरु विस्तार गरिने उल्लेख गरे ।
हाल सम्म ६५६ स्थानीय तहमा मात्रै बैंकिङ्ग पहुँच पुगेकोले बाँकि ९७ स्थानीय तहमा एक देखि डेढ महिना भित्र सेवा विस्तार गर्ने अर्थमन्त्री खतिवडाले बताए ।
भौगोलिक विकटता, मौसमी खराबी र कतिपय स्थानीय तहहरुमा अत्यावश्यक भौतिक पूर्वाधार समेत नभएका कारण वाणिज्य बैंकहरुले तोकिएको समयमा शाखा खोल्न नसकेकोे बताउदै आएका छन । अब यस्तो अवस्थामा अभौतिक रुपमा भएपनि बैंकिङ्ग सेवा सबै स्थानीय तहमा पुर्याउने अर्थमन्त्री खतिवडाको भनाई छ । मौसमी प्रतिकुलताको आधारमा अस्थायी रुपमा भएपनि सेवा पुर्याउने तयारी रहेको उनले जानकारी गराए ।
राष्ट्र बैंकको तथ्यांक अनुसार गत आर्थिक वर्ष २०७४/७५ सम्ममा ६३१ स्थानीय तहमा मात्रै वाणिज्य बैंक विस्तार भएर १२२ स्थानीय तह बैंक विहिन रहेका थिए । जस मध्ये चालु आर्थिक वर्षको दुई महिना सम्ममा २५ स्थानीय तहमा बैंकिङ्ग पहुँच विस्तार भएको हो ।
राष्ट्र बैंकले आर्थिक वर्ष २०७४/७५ भित्र सबै ७५३ नै स्थानीय तहमा शाखा विस्तार गर्न वाणिज्य बैंकहरुलाई स्थान तोकेरै निर्देशन दिएको थियो ।