साउन यता आईपिओ, एफपिओ, र हकप्रद बाहेक ५ करोड १३ लाख ४७ हजार ९५६.८३ कित्ता बोनस दर्ता भएको छ । कम्पनीहरुले धितोपत्र बोर्डमा दर्ता गरेका बोनस अघिल्लाे आर्थिक बर्ष २०७३/७४ को नाफाबाट वितरण गरेका थिए ।
दर्ता भएको बोनसमध्ये हिमालयन बैंकको सबैभन्दा धेरै २५ प्रतिशत बराबरको एक करोड ६२ लाख २९ हजार ५९ कित्ता बोनस रहेको छ भने सबैभन्दा कम सूर्योदय लघुवित्त कम्पनीको १९ प्रतिशत बराबरको ७६ हजार कित्ता बोनस रहेको छ ।
कम्पनीहरुले साधारण सभाबाट पारित गरेको बोनस सेयर नेप्सेमा कारोबारका लागि सूचीकृत गराउनुअघि नियामक निकाय धितोपत्र बोर्डमा रजिष्ट्रेशन गराउने गर्दछन् ।
पूँजी वृद्धिको दबाबमा धेरै बैंक तथा वित्तीय संस्थाले चार गुणासम्म पूँजी बढाउँदा अधिक आपूर्तिले बजारलाई वियरिस प्रवृतिमा पुर्यायाे । विस्तारै बजारले अहिले भने लय समात्न थालेको छ ।
गत आर्थिक बर्षमा लाभांश घोषणा गरेका सूचीकृत कम्पनीहरुले गत आर्थिक बर्षमा मिश्रीत (बोनस र नगद दुबै) लाभांश प्रस्ताव गरेका छन् । धेरै कम्पनीले बोनस भन्दा नगद लाभांशलाई जोड दिएका छन् । यसले बजारमा यसअघि देखिएको अधिक आपूर्तिको समस्यालाई केही हदसम्म न्यूनिकरण हुनेछ ।
सबै कम्पनीले बोनस सेयरलाई प्रथामिकता दिएर लाभांश वितरण गर्दा धितोपत्रको दोस्रो बजारमा सेयरको आपूर्ति बढ्ने गर्दछ ।
सेयर बजारमा प्राथामिक निष्काशन, एफपिओ, हकप्रद र बोनसबाट सेयरको आपूर्ति दिन प्रतिदिन बढ्दै गइरहेको छ । तर बजारमा थपिने सेयर संख्याको आधारमा माग सृर्जना गर्न भने सकिएको छैन । यसले गर्दा ठूला कारोबारीहरुले बजारमा कारोबार बढाउँदा मात्र बजार गतिशिल (बुलिस) हुने गरेको छ ।
ठूलो कारोबारी सेयर बजारमा बाहिरिँदा बजार घट्ने गरेको छ । सेयर बजार स्थायीत्व कायम गर्न संस्थागत लगानीकर्ता जसलाई मार्केट मेकरको रुपमा पनि बुझ्ने गरिन्छ उनीहरुलार्इ प्रवेशलाई सहज बनाएर बजारमा भित्र्याउनु आवश्यक छ । जसका लागि नियामक निकाय र सम्बन्धित सरोकारवालले बजारमा नयाँ लगानीकर्ता प्रवेश गर्ने आधार निमार्ण गर्न ढिला गर्नुहुँदैन । यसले सेयर बजारमा लगानी गर्ने अाम लगानीकर्तालार्इ निराश बन्ने अवस्थामा पुर्याउँदैन जसले सेयर बजारकाे विकास गर्दै पूँजी बजारबाट स्राेत संकलन गरेर देश विकासमा नै टेवा पुग्ने गर्दछ ।