नेपाल स्टक एक्सचेञ्जका अनुसार मेरो माइक्रोफाइनान्सको १५ प्रतिशत बोनसपछि प्रतिकित्ता शेयरमूल्य एक हजार १४१ रुपैयाँ ७४ पैसामा समायोजन भएको छ ।
समायोजित शेयरमूल्यलाई आधार मानेर मंगलबार माइक्रोफाइनान्सको नेप्सेको बुधबार शेयर कारोबार सूचारू हुनेछ ।
नेप्सेमा १८० दिन कारोबार भएको शेयरमूल्यको आधारमा माइक्रोफाइनान्सको औसत आधार मूल्य एक हजार ८६ रुपैयाँ ८७ पैसा कायम भएको नेप्सेले जनाएको छ ।
माइक्रोफाइनान्सले गत आर्थिक बर्षको लाभांश वितरण तथा साधारण सभाका लागि असोज १७ गते बुधबारदेखि शेयरधनी दर्ता पुस्तिका बन्द गरेको हो । यसअनुसार मंगलबारसम्म कायम रहने शेयरधनी मात्र लाभांश पाउनेछन् । बुकक्लोजपछि शेयर खरिद गर्ने लगानीकर्ताहरु लाभांश प्राप्त गर्न र साधारण सभामा सहभागि हुन पाउँदैनन् ।
मेरो माइक्रोफाइनान्सले कात्तिक ९ गते छैटौं बार्षिक साधारण सभा आह्वान गरेको छ । सभाले गत बर्षको नाफाबाट सञ्चालक समितिले प्रस्ताव गरेको १५ प्रतिशत बोनस र ११.३२ प्रतिशत नगद गरि कूल २६.३२ प्रतिशत लाभांश वितरणका लागि अनुमोदन गर्नेछ ।
साधारण सभाबाट कम्पनीले बोनस पश्चात कायम हुने पूँजी बराबर नै (शतप्रतिशत) हकप्रद जारी गर्ने प्रस्ताव समेत पारित गर्नेछ । लघुवित्तको सेवालाई अझ सबल र सक्षम रुपमा विस्तार थप पूँजी आवश्यक पर्ने भएकाले हकप्रद निष्काशन गर्न लागेको कम्पनीले जनाएको छ ।
कम्पनीले गत आर्थिक बर्षमा वितरण गरेको १५ प्रतिशत बोनस सेयर पश्चात कायम हुने चुक्ता पूँजी ३२ करोड ८९ लाख बराबरको हकप्रद जारी गर्ने प्रस्ताव गरेको छ । यस हकप्रद पश्चात माइक्रोफाइनान्सको चुक्ता पूँजी ६५ करोड ७८ लाख रुपैयाँ पुग्नेछ ।