३ वर्षपछि अन्तर्राष्ट्रिय उडान गर्ने योजनामा रहेको कम्पनीले एयरलाइन्सले अन्तर्राष्ट्रिय उडानमा ३० प्रतिशतमात्रै सेयर राखेर बाँकी ७० प्रतिशत साधारण शेयर बिक्री गर्ने घोषणा गरेको छ ।
कम्पनीले सर्वसाधारणलाई ३० प्रतिशत, ३० प्रतिशत अन्तर्राष्ट्रिय रणनीतिक साझेदारलाई र बाँकी १० प्रतिशत हवाई क्षेत्रमा आउन चाहने स्वदेशी संघ/संस्था या व्यक्तिले पाउने कम्पनीले जनाएको छ ।
एटीआर जहाज चलाउन थालेको १० वर्ष पुगेको अवसरमा आयोजित कार्यक्रममा बुद्ध एयरले उक्त घोषणा गरेको हो ।
बुद्धका प्रबन्ध निर्देशक वीरेन्द्रबहादुर बस्नेतले आन्तरिक तर्फ निजी कम्पनीकै रूपमा सेवा सञ्चालन गरिने र अन्तर्राष्ट्रिय तर्फ पब्लिकमा जाने कम्पनीको योजना भएको बताए ।
अन्तर्राष्ट्रिय उडानलाई नै पब्लिकका रूपमा लगिने प्रष्ट पार्दै उनले पोखरामा अन्तर्राष्ट्रिय विमानस्थल बनेपछि त्यहाँबाट उडान सुरु गर्ने जानकारी दिए । अन्तर्राष्ट्रिय उडानका लागि लाइसेन्स पाइसकेको बुद्धले अहिले काठमाडौंबाट भारतका बनारसमा उडान गरिरहेको छ ।
नेपालमा हालसम्म कुनै पनि हवाई सेवा प्रदायक कम्पनी पब्लिकमा भएका छैनन् । बुद्धसँग हाल साना ठूला गरी ११ वटा विमान छन्। ७२ सिट क्षमताको ६ वटा एटिआर ७२-५००, ४७ सिट क्षमताको ३ वटा एटिआर ४२–३२० र १९ सिट क्षमताको २ वटा बीचक्राफ्ट १९०० डी विमान छन्।
