यस साता सेयर बजारमा कारोबारमा आएका ११ उप समूहमध्ये जीवन बीमा सहित ८ उप समूहमा बढोत्तरी भएको छ भने व्यापारको सूचक स्थिर रहँदा नेप्से सहित बैंकिङ्ग र अन्यको सूचकमा गिरावट आएको छ ।

सातामा समग्र नेप्से परिसूचक ०.९१ अंकले घटेको छ । आइतबार १२२७.३७ अंकम खुलेको बजार अन्तिम दिन बिहीबार १२२८.२८ अंकमा बन्द भएको हो ।

अन्य उप समूहको सूचाङ्क सबैभन्दा धेरै १२.५३ अंकले घटेको छ भने बैंकिङ्कको इन्डेक्स सबैभन्दा धेरै ४.८५ अंकले घट्न पुग्यो ।

यस साता जीवन बीमाको सूचाङ्क सबैभन्दा धेरै ७१.०४ अंकले बढेको छ । जीवन बीमालाई पच्छाउँदै निर्जीवन बीमा पनि ६५.०५ अंकले बढ्न पुगेको छ । त्यसैगरि होटलको सूचाङ्क ५२.३३, जलविद्युत १८.३२, लघुवित्त १३.७९, अन्य १३.२२, विकास बैंक २.६५, उत्पादनमूलक १.९६, र वित्तको सूचाङ्क १.४७ अंकले बढेको छ ।

पाँचैदिन खुला रहेको यस साताको बजार तीन कारोबार दिन नेप्से सूचक बढेको छ भने दुई कारोबार दिन मात्र घटेको छ । साताको पहिलो कारोबार दिन आइतबार दोहोरो अंकले घटेको बजार सूचक अन्तिम दिन बिहीबार भने झण्डै दोहोरो अंक –९.९५) ले नै बढेको छ ।

शेयर बजारका लगानीकर्तालाई दशैंको माहोलले छोपेपछि अघिल्लो साताको तुलनामा यस साता कारोबार रकम समेत ३२.९१ प्रतिशतले घटेको छ । अघिल्लो साता २ अर्ब ३८ करोड ६८ लाख ६० हजार रुपैयाँको कारोबार भएको बजारमा यस साता एक अर्ब ६० करोड १२ लाख ७० हजार रुपैयाँ बराबरको मात्र शेयर खरिद बिक्री भए ।

उच्च कारोबार गर्ने कम्पनीहरुमा वाणिज्य बैंकहरुको नै दबदबा यस साता भने यस साता केही घटेको छ । उत्कृष्ट कारोबार गरेका दश कम्पनीमा वाणिज्य बैंक बाहेक अन्य चार कम्पनी रहेका छन् । 

कारोबार रकम र कारोबार भएको शेयर संख्या दुबैको आधारमा माछापुच्छ्रे बैंक लिमिटेड अग्रस्थानमा रहेको छ । बैंकको ६ लाख ७६ हजार कित्ता शेयर १४ करोड ४४ लाख ८० हजार रुपैयाँ बराबरमा खरिद बिक्री भएको छ ।

त्यसैगरि एनआईसी एशिया बैंक, एनएमबि बैंक, सानिमा माइ हाइड्रोपावर, नाडेप लघुवित्त, नेपाल लाईफ इन्स्योरेन्स, नेपाल बैंक, चिलिमे हाइड्रोपावर कम्पनी, मेगा बैंक नेपाल, र प्रभु बैंकको उच्च कारोबार भएको छ ।
दशौं ठूलो कारोबार भएको प्रभु बैंकको ४ करोड ३४ लाख २० हजार रुपैयाँ बराबरको शेयर कारोबार भएको छ ।