युनाइटेड फाइनान्सले मुत्तूट फाइनान्सलाई संस्थापक एफपिओ बिक्री गर्ने प्रस्ताव पारित गर्न यहि कात्तिक ३० गते २४ अाैं बार्षिक साधारण सभा डाकेको छ ।
अघिल्लो साधारणसभा बाट कम्पनीले नियामक निकायको निर्देशन अनुरुप फाइनान्सको प्रबन्धपत्र तथा नियमावलीमा आवश्यक सबै संसोधनहरु गर्न सञ्चालक समितिलाई अख्तियारी प्रदान गर्ने लगायतका प्रस्ताव पारित गराएको थियो ।
यो साधरणसभाले मुत्तूट फाइनान्सलाई प्रिमियम सहित प्रतिकित्ता १९० रुपैयाँका दरले संस्थापक एफपिओ बिक्री गर्ने र उसको तर्फबाट एकजनालाई सञ्चालक समितिमा चयन गर्ने लगायतका प्रस्ताव पारित गर्नेछ ।
युनाइटेड फाइनान्सले भारतको कोचीस्थित मुत्तूट फाइनान्सलाई वैदेशिक रणनीतिक साझेदारीको रुपमा संस्थापक एफपिओ बिक्री गरेर भित्र्याउन लागेको हो । मुत्तूटलाई २० प्रतिशत अर्थात २१ लाख कित्ता संस्थापक सेयर दिएर साझेदार बनाउन लागिएको हो ।
साथै फाइनान्सले गत बर्षको नाफाबाट प्रस्ताव गरेको पाँच प्रतिशत नगद लाभांश वितरणको प्रस्ताव समेत पारित गर्नेछ । राष्ट्र बैंकले तोकेको चुक्ता पूँजी कायम गरिसकेको फाइनान्सले प्रस्ताव गरेको लाभांश विगत ८ बर्षयता कै कम हो ।
८० करोड ५ लाख रुपैयाँ चुक्ता पूँजी रहेकाे फाइनान्सले गत बर्ष ६ करोड ४१ लाख रूपैयाँ नाफा कमाएको थियो । गत आर्थिक बर्षमा उसको प्रतिशेयर आम्दानी ८ रुपैयाँ ०१ पैसा मात्र रहेको छ।
साधारण सभाकाे प्रयोजनका लागि कात्तिक १३ गतेदेखि बुकक्लोज गर्ने कम्पनीले जनाएको छ । यसअनुसार १२ गतेसम्म कायम रहने शेयरधनीले नगद लाभांश पाउनेछन् ।
