चालु आर्थिक बर्षको सबैभन्दा न्यून बिन्दुमा वाणिज्य बैंकहरुको शेयरमा लगानीगर्ने चार बैंकका लगानीकर्ता मात्रै नोक्सानीमा देखिएका छन् ।
यसवधिमा उच्च नोक्सानी व्योहोर्ने लगानीकर्ता पनि तीन प्रतिशत भन्दा कम नोक्सानीमा छन् ।
यो आँकडाले पनि शेयरबजार घटेको बेला बजार छिर्ने लगानीकर्तालाई नाफा कमाउने अवसर सधैँ रहन्छ भन्ने देखाउँछ ।
यहाँ चालु आर्थिक बर्षको सबैभन्दा न्यून बिन्दु ११६३ अंक पुगेको बजारको शेयरमूल्यको आधारमा बैंकहरुको शेयरमूल्यको उतारचढावलाई कार्तिक ६ गते मंगलबारको शेयरमूल्यको आधारमा विश्लेषण गरिएको छ । गत साउन २७ गते नेप्से चालु आर्थिक बर्षकै न्यून बिन्दुमा रहेको थियो ।
नेप्से इन्डेक्स न्यून विन्दुमा रहदा बजार छिर्ने एनआईसी एशिया बैंकका लगानीकर्ताले सबैभन्दा धेरै ४७.०४ प्रतिशतसम्म कमाएका छन् भने स्ट्याण्र्डड चार्टर्ड बैंकमा लगानी गर्नेले सबैभन्दा धेरै २.८८ प्रतिशतसम्म गुमाएका छन् । एभरेष्ट, नेपाल एसबिआई र हिमालयन बैंकका लगानीकर्ता नोक्सानीमा रहदा अन्य सबै वाणिज्य बैंकका लगानीकर्ता नाफामै रहेको देखिन्छ ।
त्यस्तै ३० प्रतिशत भन्दा धेरै मुल्य वृद्धि हुनेमा प्रभु बैंक, कुमारी बैंक र बैंक अफ काठमान्डू रहेको छ । यस्तै २० देखि ३० प्रतिशत सम्म शेयर मुल्य वृद्धि हुनेमा मेगा, जनता, एनसीसी र प्राइम कमर्सियल बैंक रहेका छन् ।
१० देखि २० प्रतिशत सम्म शेयर मुल्य वृद्धि हुनेमा सिभिल, एनएमबि, सेन्चुरी, सनराइज, सिद्धार्थ, सानिमा, कृषि विकास, ग्लोबल आइएमई, माछापुच्छ्रे र नेपाल बैंक रहेका छन् ।
नेपाल बंगलादेश, नबिल, लक्ष्मी र नेपाल इन्भेष्टमेन्ट बैंकको शेयर मूल्य १० प्रतिशत भन्दा कम बढेको छ ।
चालु आर्थिक वर्ष २०७५/७६ को हाल सम्ममा नेप्से इन्डेक्स असोज ९ गते सबै भन्दा उच्च १२८०.०५ बिन्दुमा पुगेको थियो भने साउन २७ गते सबै भन्दा कम ११६३.९४ विन्दुमा झरेको थियो । कार्तिक ६ गते १२४१.८४ बिन्दुमा छ ।