केही दिन अघि नेपाल धितोपत्र बोर्डले ८ मर्चेण्ट बैंकरहरुलाई आफ्नो खातामा सेयर जम्मा गरी दोस्रो बजारबाट तेस्रो पक्षको खातामा पठाउन निर्देशन दिएको थियो ।
नेपाल बैंकको एफपिओ निष्काशनका दौरान तेस्रो पक्षसँग सम्झौता गरेर सिधै उनीहरुको खातामा सेयर पठाउने सम्झौता मर्चेण्ट बैंकरहरुले गरेका थिए । उक्त सम्झौता उल्ट्याउदै बोर्डले दोस्रो बजारबाट मात्र तेस्रो पक्षको नाममा सेयर पठाउन निर्देशन दिएको थियो ।
सो लगत्तै मर्चेण्ट बैंकरहरुले फेरी बोर्डलाई आफ्नो निर्णयमा पुनरविचारको माग गर्दै लिखित पत्र बुझाएका छन् ।
यसरी बोर्ड र प्रत्याभुतकर्ताको दोहोरी बढ्न थालेपछि एफपिओमा लगानी गरेकाहरु अलमलमा परेका छन् । सेयर बाँडफाँड भएको लामो समय बित्दा समेत आफ्नो सेयर पाउन नसकेकाहरु घट्दो बजारको शिकार हुने देखिएको छ ।
नियामक निकायले गरेको निर्णयलाई तत्काल कार्यान्वयन गरेको भए सायद लगानीकर्ता समस्यामा पर्ने थिएनन् ।
मर्चेण्ट बैंकरहरुको समस्या पनि आफ्नो ठाउँमा छ । तर यसै पनि सेयर सूचीकरणमा भएको ढिलाईलाई झनै पर धकेल्ने गरी सुरु भएको दोहोरी भने लगानीकर्ताको हित विपरित छ ।
मर्चेण्ट बैंकरहरुले धितोपत्र बोर्डलाई लिखित रुपमा धितोपत्र बोर्डले एफपिओ स्वीकृत गर्दा यो विषयलाई हेरेको भन्दै निर्णय परिवर्तन नगर्न आग्रह गरेका छन् ।
बोर्डले दिएको स्वीकृति अनुसार नै सेयर निष्काशन भएकाले पहिलो पटकको समस्यालाई सम्झौता अनुसार तेस्रो पक्षको नाममा सेयर नामसारी गराई समस्या सुल्झाई दिन पत्र मार्फत आग्रह गरिएको छ ।
