- ४७ हजार जनाले २० कित्ता पाउँदा १० कित्ता पाउने कति ?
आँखु खोला जलविद्युत कम्पनीको साधारण सेयर बाँडफाँडको मोडल तयार भएको छ । कम्पनीको सेयरमा आवेदन गरेका मध्ये ४७ हजार ४ सय जनाले २० कित्ताको दरले सेयर पाउने गरी मोडल तयार भएको छ । कम्पनीको आईपिओमा परेका आवेदन मध्ये ६१ व्टा आवेदन रद्ध भएका छन् ।

  कम्पनीको सेयर निष्काशन तथा बिक्री प्रबन्धक सिभिल क्यापिटलले सेयर बाँडफाँडको मोडल तयार गरेर धितोपत्र बोर्डमा पठाएको छ ।

अब बोर्डले बाँडफाँडको अनुमति दिए पछि आइतबार सेयर बाँडफाँड गरिने क्यापिटलले जनाएको छ । जस अनुसार कम्पनीको सेयरमा आवेदन गरेका ८३ हजार ३ सय १६ जनालाई सेयर बाँडफाँड हुनेछ ।

पहिलो चरणमा ८३ हजार ३ सय १६ आवेदकलाई १० कित्ताका दरले ८ लाख ३३ हजार १ सय ६० कित्ता सेयर बाँडफाँड गरिने मोडलमा उल्लेख छ । यसरी बाँडफाँड गर्दा बाँकी रहने ४ लाख ७४ हजार कित्ता सेयर १० कित्ताका दरले ४७ हजार ४ सय आवेदकलाई थप सेयर बाँडफाँड गर्ने मोडलमा उल्लेख छ ।

जस अनुसार दोस्रो पटक थप १० कित्ता सेयर पाउनेहरुले जम्मा २० कित्ता सेयर पाउने छन् भने पहिलो चरणका ८३ हजार ३ सय १६ मध्ये ३५ हजार ९ सय १६ आवेदकले १० कित्ता मात्र सेयर पाउने छन् ।

धितोपत्र बोर्डले उल्लेखित मोडलमा परिमार्जन गर्दै सबै आवेदकलाई १५ कित्ता सेयर बाँडफाँड गराउन सक्ने सम्भावना पनि रहन्छ । बोर्डले मोडल स्वीकृत गरे पछि आइतबार बाँडफाँड गरिने सिभिल क्यापिटलले जनाएको छ ।

क्यापिटलका अनुसार कम्पनीको सेयरमा ४.४३ गुणा बढी आवेदन परेको हो । कर्मचारीका लागि २७ हजार ५ सय २० कित्ता सेयर छुट्याइएकोमा जम्मा ५ जनाले ५९ कित्ता सेयर मात्र माग गरेका छन् । कर्मचारीले नकिनेको २७ हजार ४ सय ६१ कित्ता सेयर सर्वसाधारण आवेदकलाई बितरण गर्ने मोडलमा उल्लेख छ ।

कम्पनीको वित्तीय अवस्था कमजोर रहेका कारण कम्पनीका कर्मचारीले आवेदन नगरेका हुन् । कम्पनीका सेयरधनीले लाभांस पाउनका लागि लामो समय कुर्नु पर्ने विषय कम्पनीले नै विबरण पत्रमा उल्लेख गरेको छ ।

६० करोड रुपैंया चुक्ता पूँजी रहेको कम्पनीको साधारण सेयर पश्चात चुक्ता पूँजी ८० करोड रुपैंया पुग्नेछ । यसमा आयोजना प्रभावितका लागि यस अघि बिक्री गरिएको सेयर समेत पर्नेछ ।

सेयर बाँडफाँडको मोडल यस्तो छ ।