सिद्धार्थ बैंकले प्रतिकित्ता एक हजार रुपैयाँ अंकित मूल्यमा २२ लाख ५० हजार कित्ता ऋणपत्र निष्काशन अनुमतिका लागि धितोपत्र बोर्डमा निवेदन दर्ता गराएको बाेर्डले जनाएकाे छ ।
निष्काशन हुन लागेको ऋणपत्रमध्ये २० प्रतिशत अर्थात ४५ करोड रुपैयाँ सर्वसाधारणका लागि र ८० प्रतिशत अर्थात एक अर्ब ८० करोड रुपैयाँ व्यक्तिगत तबरबाट बिक्रीमा ल्याउने सिद्धार्थ बैंकले जनाएको छ ।
बैंकको ऋणपत्रमा लगानी गर्ने लगानीकर्ताले बार्षिक १०.५ प्रतिशत ब्याज अर्धवार्षिक रुपमा प्राप्त गर्नेछन् । १०.५% एसबिएल डिवेञ्चर २०८२ नाम दिइएको छ उक्त ऋणपत्रको बिक्री प्रबन्धकमा एनआईबिएल एस क्यापिटल चयन भएको छ ।
हाल बैंकमा बचत खाताको ब्याजदर ५ प्रतिशत देखि ७ प्रतिशतसम्म रहेको छ । ऋणपत्रमा १०.५ प्रतिशत ब्याज पाइने भएकाले यसमा गरिने लगानीबाट उच्च प्रतिफलको अवसर हुने बैंकले जनाएको छ ।
बाेडर्बाट अनुमति पाएपश्चात बैंकले सर्वसाधारणमा ऋणपत्र बिक्रीमा ल्याउनेछ ।
राष्ट्र बैंकले वाणिज्य बैंकको पूँजी कोष अनुपात न्यूनतम ११ प्रतिशत हुनुपर्ने व्यवस्था गरेको छ । पूँजी कोष अनुपात गणना गर्दा ऋणपत्रलाई पुरक पूँजीको रुपमा गणना गर्न पाइने सुविधा राष्ट्र बैंकले दिएको छ। यसरी पूँजी कोष अनुपातमा वाणिज्य बैंकहरुलाई ५ प्रतिशत हिस्सा पुरक पूँजीबाट मिलाउन पाउने व्यवस्था छ ।
यसअघि एनआईसी एशिया बैंकले ११ प्रतिशत ब्याजदरकाे भदौ महिनामा ७ बर्ष अवधिकाे १ अर्ब ८३ करोड रुपैयाँको ऋणपत्र निष्कासन गरिसकेकाे छ भने चाैंथाे पटक फेरि ११ प्रतिशत ब्याजदरमै १० बर्ष अवधिकाे ४ अर्ब रुपैयाँको ऋणपत्र ल्याउन बिक्री प्रबन्धक ताेकिसकेकाे छ ।
सानिमा बैंकले १० बर्ष अवधिकाे दुर्इ अर्ब रूपैयाँकाे सानिमा डिबेञ्चर जारी गर्न कात्तिक ७ गते धिताेपत्र बाेर्डकाे अनुमति पाएकाे छ । यसमा १० प्रतिशत ब्याजदर प्राप्त हुने बैंकले जनाएकाे छ ।