केन्द्रीय बैंकले २०७५ मंसिर २ गतेदेखि त्रैमासिक रुपमा ब्याज भुक्तानी हुनेगरि ३६४ दिने मुद्धती निक्षेपमा लगानी गर्न लागेको हो ।
राष्ट्र बैंकले वाणिज्य बैंकहरुमा एक अर्ब १४ करोड ५० लाख, राष्ट्रिय स्तरका विकास बैंकहरुमा २१ करोड ४६ लाख रुपैयाँ र राष्ट्रिय स्तरका वित्त कम्पनीहरुमा ७ करोड १६ लाख रुपैयाँ निक्षेप लगानी गर्ने भएको हो ।
राष्ट्र बैंकले मुद्धती निक्षेप लिन चाहाने राष्ट्रिय स्तरका वाणिज्य बैंक, विकास बैंकहरु र र वित्त कम्पनीहरुलाई लिन चाहेको रकम र प्रस्तावित ब्याजदर सहित कार्तिक २० गते दिउँसो ३ बजेभित्रसम्म शिलबन्दी दरभाउपत्र आवेदन दिन भनेको छ ।
हाल बजारमा तरलता अभाव रहेको बैंकरहरुले बताइ रहदा राष्ट्र बैंकले एक अर्ब ४३ करोड रुपैयाँ निक्षेप दिने भएपछि बैंक तथा वित्तीय संस्थाहरुमा तरलता सहज हुने विश्वास राष्ट्र बैंकको छ ।
निक्षेप लिन राष्ट्र बैंकको यस्ता छन् शर्त
बैंक तथा वित्त संस्थाहरुले रकम लिनका लागि आवेदन पेश गर्ने विभिन्न मापदण्ड समेत तोकेको छ । जसमा बैंक सञ्चालनमा आएको कम्तिमा २ वर्ष पुरा भएको, न्यूनतम पूँजी कोष कायम रहेको, निष्कृय कर्जा अनुपात कुल कर्जा सापटको ५ प्रतिशत भन्दा कम भएको, खूद तरल सम्पत्ति स्वदेशी निक्षेपको कम्तीमा २० प्रतिशत वा सो भन्दा बढी भएको हुनुपर्ने राष्ट्र बैंकले शर्त छ ।
त्यसैगरी, कर्जा र स्वदेशी निक्षेप र प्राथमिक पूँजी अनुपात बैंकले समय समयमा निर्धारण गरेको सीमाभित्र रहेको, निकटतम अघिल्लो आर्थिक वर्षमा बैंक सञ्चालन मुनाफामा रहेको, रियल स्टेट कर्जा बैंकबाट तोकिएको सीमाभन्दा बढी नभएको हुनुपर्ने प्रावधान छ ।
त्यसैगरि शीघ्र सुधारात्मक कारबाहीमा परेको भए फुकुवा भएको कम्तीमा ६ महिना पुरा भएको, बैंक तथा वित्तीय संस्था कारबाहीमा परी समस्याग्रस्त घोषणा नभएको, सर्वसाधारणको लागि छुट्टाइएको शेयर जारी गरीसकेको हुनुपर्ने केन्द्रीय बैंकले जनाएको छ ।