नेपाली शेयर बजारको इतिहासमा सुरु भएको नयाँ प्रणालीप्रति सम्बद्ध पक्षहरु धेरै आशावादी छन् ।
यसले नेपालको शेयर बजारलाई अन्तर्राष्ट्रिय स्तरमा पुर्याउने अपेक्षा गरिएको छ । यसले शेयर बजारलाई आधुनिक चरणमा पुर्याउनुका साथै बजारको विकास र पहुँच विस्तारले शेयर बजारमा नयाँ आयाम ल्याउने विश्वास गरिएको छ ।
लगानीकर्ताहरुले घरमै बसेर शेयर खरिद बिक्री गर्न सक्ने अवस्थाले यो सम्भव छ । यसै सन्दर्भ मेरोलगानी संवाददाता सुधा देवकोटाले बजार सम्बद्ध व्यक्तिहरुसँग गरेको कुराकानीको सारांश ।
- अम्बिका पौडेल, अध्यक्ष, नेपाल इन्भेष्टर्स फोरम
नेपालको पूँजी बजारले प्रविधिमा फड्को मारेको छ । नेपालको पूँजी बजार विगत केही समय देखि ओरालो गतिमा रहेको सन्दर्भमा अब सकरात्मक असर पर्ने आश गरेको छु ।
आज देखि सुरु भएको अनलाईन प्रणालीले पूँजी बजारको दायरालाई फराकिलो बनाएको छ ।
यसले सबै लगानीकर्तालाई सहज बनाउँदै पूँजी बजारलाई विस्तार गरेको छ ।
पूँजी बजारको सबै इन्डिकेटरहरु सकारात्मक भएका छन् र प्रविधि पनि सकारात्मक भएको कारणले आगामी दिन पूँजी बजारको लागि सुनौलो अवसरको रुपमा लिन सकिन्छ ।
- दिलिप मुनाकर्मी, लगानीकर्ता
अनलाईन प्रणालीसँगै पूँजी बजारले एउटा फड्को मार्नेछ । त्यससँगै लगानीकर्ताले यसको जोखिमलाई पनि ध्यान दिनुपर्ने हुन्छ ।
पहिले ब्रोकर चेकिङ्ग प्वाइन्ट थियो । अब लगानीकर्ता सिधै कारोबारमा जान्छन् ।
लगानीकर्ता स्वयंले कारोबार गर्दा त्यसबाट हुने जोखिमहरु पनि सँगै हुन्छ । अब लगानीकर्ताहरु सचेत र सजग हुनुपर्ने बेला आएको छ ।
लगानीकर्ताको संख्या असीमित रुपमा बढाउन सक्ने भएकाले लगानीकर्ताको हातमा नै सबै प्रणाली पुग्नु सान्दर्भिक छ ।
सबैले यसको भरपुर सदुपयोग गर्नुपर्छ ।
- भरत रानाभाट, अध्यक्ष, स्टक ब्रोकर एशोसिएसन
अनलार्इन प्रणाली मार्फत कारोबार गराउने सफ्टवेयर अन्तर्राष्ट्रिय स्तरको छ । नयाँ प्रविधिको विकास सँगै चुनौती पनि हुन्छ । तर चुनौती छ भन्दैमा प्रयोग नै नगर्ने भन्ने हुँदैन ।
हाम्रो सन्दर्भमा भुक्तानी तथा राफसाफ विद्युतीय बनाउन नीतिगत व्यवस्था नहुँदा अनलार्इन प्रणाली अरु मुलुकको जस्तो हुन सकेन । यसलाई परिमार्जन गर्दै लैजानुपर्छ ।
अनलार्इन प्रणाली आजबाट बल्ल सुरु हुँदैछ । यसलाई राम्रोसँग प्रयोग नगरेसम्म समस्या के छ कसैलाई थाहा हुँदैन् ।
यसलाई प्रयोग गर्दै जाँदा प्राविधिक समस्याहरु देखा पर्न सक्छन् । तिनीहरुलाई पनि क्रमिक रुपमा समाधान गर्दै अगाडि बढनुपर्छ ।
- श्रीजेश घिमिरे, प्रमुख कार्यकारी अधिकृत, एनएमबी क्यापिटल
अनलार्इन प्रणाली नेपालको पूँजी बजारमा कोशेढुङ्गाको रुपमा आएको छ । यसले पूँजी बजारको धेरै ठूलो बजारलाई ओपन अप गरेको छ ।
ग्रामीण भेगमा पुग्न नसकेको पूँजी बजार अब सबैको हात हातमा पुगेको छ ।
यसले शेयर बजारलाई परिपक्क बनाउने छ। नेपालको शेयर बजारमा धेरै लगानीकर्ताहरु भित्रिने सम्भावना बढेको छ ।