सनराइजले नेपाल फाइनान्सियल रिपोर्टिङ स्ट्याण्डर्ड (एनएफआरएस) रिर्पोट अनुसार ३३ करोड १४ लाख रुपैयाँ खुद मुनाफा आर्जन गरेको छ । बैंकले गत वर्ष यसै अवधिमा २० करोड ३७ लाख खुद नाफा गरेकोमा १२ करोड ७७ लाखले मुनाफा बढाएको हो ।
रेगुलेटरी एड्जस्टमेन्टले फ्रि प्रोफिटमा संकुचन
एनएफआरएस प्रतिवेदन अनुसार सनराइज बैंकले २७ करोड २० लाख रुपैयाँ वितरण योग्य नाफा (फ्रि प्रोफिट) आर्जन गरेको उल्लेख छ । गत वर्ष यस्तो रकम २० करोड ३७ लाख रहेको थियो ।
चालू आवको प्रथम त्रैमासमा राष्ट्र बैंकको रेगुलेटरी एडजस्टमेन्टमा ५ करोड ९४ लाख व्यवस्था गर्दा बैंकको फ्रि प्रोफिट खुद नाफाभन्दा घटेको हो । तर गत बर्षको प्रथम त्रैमासको तुलनामा भने चालू आवको यसै अवधिमा तुलनामभा भने ३३.५३ प्रतिशतले फ्रि प्रोफिट बढेको छ ।
एनएफआरएस रिर्पोट अनुसार रेगुलेटरी एड्जस्टमेन्ट पश्चात कायम हुने फ्रि प्रोफिट केन्द्रीय बैंकले तोकेको प्रावधान अनुसार तोकिएको शिर्षकहरुमा व्यवस्था गरेपश्चात बैंकले शेयरधनीलाई लाभांश वितरणमा उपयोग गर्न सक्दछ ।
चुक्ता पूँजी स्थिर रहँदा प्रतिशेयर आम्दानीमा सुधार, जगेडा आकर्षक
बैंकको चुक्ता पूँजी ८ अर्ब १५ करोड २५ लाख रुपैयाँमा स्थिर रहेपश्चात बैंकको वार्षिक प्रतिशेयर आम्दानी ९ रुपैयाँ ९९ पैसाबाट १६ रुपैयाँ २६ पैसामा बढेको छ ।
बैंकको प्रतिशेयर नेटवर्थ १४५ रुपैयाँ ७५ पैसा र मूल्य आम्दानी अनुपात १५.०६ गुणा बढी रहेको छ ।
समिक्षा अवधिमा बैंकले ११७.२९ प्रतिशतले जगेडा कोष बढाउँदा तीन अर्ब ७३ करोड एक लाख सञ्चित हुन पुगेको छ । गत वर्षको प्रथम त्रैमासमा बैंकको जगेडा कोषमा एक अर्ब ७७ करोड ६६ लाख रुपैयाँ मात्र सञ्चित रहेको थियो ।
निक्षेप संकलन र कर्जा विस्तार सन्तुलित
निक्षेप संकलन गत आवको प्रथम त्रैमासमा बैंकले निक्षेप संकलन १९.१४ र कर्जा विस्तारलाई २२.२१ प्रतिशतले बढाउँदै आफ्नो खुद नाफा बढाएसँगै बैंकको अधिकांश सूचक सकारात्मक देखिएका हुन् ।
यस अवधिमा बैंकको निक्षेप ६३ अर्ब ६१ करोड ५४ लाख रहेकोमा ७५ अर्ब ७९ करोड २४ लाखमा बढोत्तरी गरेको छ । त्यसैगरि कर्जा परिचालनतर्फ ५४ अर्ब ४९ करोड १७ लाख रहेकोमा बढोत्तरी गरेर ६६ अर्ब ५९ करोड ३४ लाख रुपैयाँ लगानी गरेको छ ।
निष्कृय कर्जा अनुपात घट्यो
व्यवसायको आकारमा बढोत्तरी गर्दा समेत खराब कर्जा नियन्त्रण गर्दै जाने बैंकहरुको सूचीमा सनराइज पनि परेको छ । बैंकले गत आर्थिक वर्षको तीन महिना अवधिमा बैंकमा रहेको १.४९ प्रतिशतको खराब कर्जा अनुपातलाई चालू आवको प्रथम त्रैमासमा १.१२ प्रतिशतमा झरेको छ ।
खुद ब्याज आम्दानी ८२ करोड
निक्षेप संकलन र कर्जा प्रवाह दुबै बढाएर प्रगति गर्न तम्सिएको यस बैंकले चालू आवको तीन महिना अवधिमा नै ८२ करोड १८ लाख रुपैयाँ खुद ब्याज आम्दानी आर्जन गरेको छ । यस अवधिमा बैंकले २ अर्ब २० करोड ब्याज आम्दानी गरेर १ अर्ब ३७ करोड ब्याज खर्च गरेको हो ।
गत आर्थिक वर्षको प्रथम त्रैमास अवधिमा बैंकको खुद ब्याज आम्दानी ५१ करोड ३८ लाख रहेको थियो । समीक्षा अवधिमा बैंकको खुद ब्याज आम्दानी ३० करोड ७९ लाख रुपैयाँले बढाएको हो ।
निक्षेप लागत ७.७०, आधार ब्याजदर १०.९७ प्रतिशत
वित्तीय बजारमा तरलताको चरम संकटको अवस्था सिर्जना हुँदा त्यसको असर बैंकको वित्तीय विवरणमा पनि देखिएको छ । बैंकको आधार ब्याजदर र निक्षेप संकलन लागतमा वृद्धि भएको छ ।
गत आवको प्रथम त्रैमासमा बैंकको निक्षेप लागत ७.३० प्रतिशतबाट ७.७० मा बढेको छ भने आधार ब्याजदर १०.८२ बाट १०.९७ प्रतिशतमा बढेको छ ।
प्रतिवेदन अनुसार सनराइज बैंकको कर्जा निक्षेप अनुपात गत वर्ष यसै अवधिमा ७६.७४ प्रतिशत रहेकोमा बढेर चालू आवको प्रथम त्रैमासिक अवधिमा ७७.५६ प्रतिशत पुगेको छ ।
राष्ट्र बैंकको व्यवस्था अनुसार हरेक वाणिज्य बैंकले एक सय रुपैयाँ निक्षेप संकलन गर्दा ८० रुपैयाँ मात्र कर्जा परिचालन गर्न पाउँछन् ।
