१०५ प्रतिशत संस्थापक हकप्रदको बुकक्लोज भए पछि नेप्सेले एभरेष्टको साधारण शेयरमा संस्थापक शेयरलाई समायोजन गरेको थियो । सो लगत्तै लगानीकर्ताहरुले मूल्य समायोजन व्यवहारिक नभएको भन्दै नेप्सेमा पुगेर ध्यानाकर्षण गराएका थिए । लगानीकर्तालाई नेप्सेले कम्पनीबाट पत्र ल्याउन भनेकोमा बिहीबार नै लगानीकर्ता एभरेष्ट इन्स्योरेन्स पुगेर घटनाक्रमका बारेमा जानकारी गराएका थिए ।
सो लगत्तै इभरेष्ट इन्स्योरेन्सले शुक्रबार नेप्सेलाई पत्र मार्फत फरक फरक वर्गका शेयरलाई एक आपसमा समायोजन गर्नु व्यवहारिक नभएको भन्दै समायोजन प्रकृया रद्ध गरिदिन आग्रह गरेको हो । इन्स्योरेन्सले संस्थापक हकप्रद निष्काशन तथा सूचीकरण पश्चात अहिलेको समायोजित मूल्यमा कारोबार हुन नसक्दा आफ्ना शेयरधनीहरु मारमा पर्ने उल्लेख गरेको छ ।
साथै उसले लगानीकर्ताको हितलाई ध्यानमा राखिदिन पनि आग्रह गरेको छ । पहिलो पटक आएको विषयले एउटै किसिमको शेयरको संख्या बढ्ने नभई नयाँ शेयरको उत्पत्ति हुने भएकाले साधारण शेयरको मूल्य समायोजन व्यवहारिक नभएको भन्दै इन्स्योरेन्सले नेप्सेलाई यस्तो आग्रह गरेको हो ।
नेप्सेमा इन्स्योरेन्सको पत्र पुग्नजा साथ लगानीकर्ताहरुको टोली पनि नेप्से पुगेको थियो । नेपाल इन्भेष्टर्स फोरमले पनि एभरेष्ट इन्स्योरेन्सको शेयर मूल्य समायोजन प्रकृया व्यवहारिक नभएको भन्दै रद्ध गरिदिन लिखित रुपमा आग्रह गरेको छ ।
